US-in Israel khawpui atana Jerusalem a pawm duhlotute pungkhawm leh

US-in Israel khawpui atana Jerusalem a pawmna duh lotute chu nimin khan an pung khawm leh a, lunga Israel sipaite an vawm hnuah buaina a chhuak zui a, Palestinian 4 an thi. Palestinian Health Ministry chuan ramri bulah mi pahnih an thi niin a sawi a, hemi hnu hian Israel sipaite hian mi pakhat an kap hlum leh tih an sawi bawk a, ramri vengtu police, chem hmanga beitu mi pakhat an kah hlum thu pawh Israel police-te chuan an sawi a ni. Israel hi US Vice President Mike Pence-a’n a tlawh dawn a, Palestinian hotute chuan US thutlukna an duh loh lantir nan Pence nena inbiak an lo tum tawh pawh an \hulh a, White House thupuangtute chuan Palestinian mi-te hian an thutlukna pawm turin hun an la duh deuh tih an hriat thiam thu leh, inbiakna chhunzawm tura an inpeih hun an nghah tur thu an sawi a ni. US-in Israel khawpuia Jerusalem a thlawp avanga buaina chhuak hi a la ziaawm thei lo a, nimin lam khan West Bank leh Gaza-ah chuan Palestinian sing chuang vel an pung khawm a, Israel sipaite chuan pawi khawih zawnga che, mi 6,000 vel an awm niin an sawi a, Palestinian Health Ministry chuan Gaza bialah mi 164, West Bank-ah 100 vel an hliam thu leh, mi panga chu an dinhmun a \hat loh thu a sawi. US President, Donald Trump-a’n Israel khawpui atana Jerusalem a pawm thu a puan hnua buaina hrang hrang chhuakah mi 8 an thi tawh a ni.