UP Police ten misual dapchhuah beihpui an thlakah darkar 48 chhungin mi 25 man

Uttar Pradesh police-ten misual dapchhuah beihpui an thlakah darkar 48 chhungin mi 25 an man a, misual pakhat an kaphlum. UP Police Special Task Force thupuangtute chuan an mi kahhlum hi thubuai 33 lai nei, Indrapal a nih thu an sawi a, kum 2013-a Uttarakhand-a police-ten man an tum tumin, police pakhat a lo kaphlum tawh niin an sawi a, tun tumah pawh hian silai a lo hmetpuak hmasa leh niin an sawi bawk. Police-ten an man zingah hian Pathianni kaltaa sumdawng Dinesh Gupta thahnaa inhnahnawih mi pahnih pawh an tel a, heng mi pahnihte hi police hmaah an inpuang tawh niin Police te chuan an sawi bawk a ni. Nikum March thlaa Yogi Adityanath-a’n sorkarna a siam hnuah, UP-ah hian police leh misualte inbeihna tum 950 a thleng tawh a, mi 200 chuang man an nih tawh bakah, mi 30 in an thih phah tawh a ni. Police-te chet dan hi National Human Rights Commission pawhin November thla khan a rinhlelh thu a lo sawi tawh a, mi an kahhlum takte nena an inbeih dan kimchang report pe tur pawhin a lo ti tawh a ni. UP DGP OP Singh chuan misual-te hi an man a tul vangin a tul ang zelin chet an la ve lo thei lo tih vawiin khan chanchinthar thehdarhtute hnenah a sawi a, silai an hmehpuah pawhin mahni invenna atana hmetpuak an nih thin thu a sawi bawk a ni.