Delhi lam pana tlan, Kaifiyat Express rel chu tukin khan Uttar Pradesh-a Auraiya district-ah chu motor pakhat nen a insu a, mi 20 chuang an hliam a, thi erawh an awm lo. Police hotu pakhat sawi danin, rel hi Azamgarh atanga chhuak a ni a, tukin dar 2:50 vel khan bawlhhlawh phur motor nen a insut tak avangin rel pindan sawm vel a let a ni. Tun hi ni li chhunga rel a chetsual vawi hnihna a ni a, puan tawh angin, Inrinni khan Utkal Express rel chu Uttar Pradesh-a Muzzafarnagar district bula Khatauli-ah chesualin, mi 23 vel an thi a, a hmuna awmte chuan he chetsualna hi rel hnathawkte fimkhur tawk loh vang leh an inthlahdah avanga thleng niin an sawi a, hemi chungchangah hian FIR pawh thehluh nghal a ni a, rel thuneitu eng emaw zat hrem an ni.
He thil thlen hnu lawkah hian Railways Minister, Suresh Prabhu chuan thuthar lakhawmtute hnenah, he chetsualnaah hian mawhphura inngaiin, ban a duh thu, PM a hrilh tawh tih a sawi a, PM chuan lo nghak rih turin a lo hrilh niin a sawi. Minister chuan khualzinte tuarna leh bungraw hloh chuan a tihhrehawm thu a sawi a, Minister a nih kum thum vel chhung hian rela zinna tihhmasawn nan theihtawp a chhuah tih sawiin, heti chunga vanduaina a thleng leh thin chu a mawhphurhna liau liau nia a ngaih thu leh, a hna chu chawlhsan a inpeih thu a sawi a ni.
