Tuirial Hydel Project hawnna programme \an a nih veleha thuhma sawitu, Union Power Minister, Pu RK Singh chuan Mizoram kawlphetha mamawh zat pumpui hi megawatt 87 a nih avangin Mizoramin kawlphetha siam chhuahna Project te tak te te a neih sa a\ang leh Tuirial Hydel Project a\anga megawatt 60 a hmuh turte hian Mizoram chu kawlphethaah a intodelhtir tawh dawn niin a sawi a, CM-in a ngen angin he Project a\anga kawlphetha siam chhuah pumpui chu Mizoram chan vek tur a ni dawn tih sawiin, a man tihhniamna turin DoNER a\angin cheng vaibelchhe 300 pek remtih a ni a, chumi hnuah chuan he Project a\anga Mizoramin kawlphetha a leina tur rate chu unit khat zelah Rs.5.20 vel a ni thei dawn niin a sawi a, Mizorama kawlphetha siam chhuah theihna tur Project hrang hrang leh a sem darhna tur Project hrang hrang atan sorkar laipui chuan cheng tam tak a ruahman tih a tarlang bawk.
CM, Pu Lal Thanhawla pawhin thusawiin, PM, Pu Narendra Modi-an Mizoram a rawn tlawh chu lawmawm a tih thu a sawi a, a kaihhruaina hnuaia hmarchhak state hrang hrang leh Mizoramin hmasawnna kawngah nasa taka hma an sawn a beisei thu te, Mizoram mipui nuai 11 vel chauh chu dawm kan ngai leh \anpui ngai an ni tih te, inkalpawhna kawng chi hrang hrang, National Highway, State Highway leh khaw kar kawng siam nan te sum tam tak an mamawh thu te, Mizoram chu ruahtui tam tak tlak \hinna ram a nih avanga kawng enkawlna atana sum mamawh a san thu te a sawi a, Mizoram mipuiten Hindi an thiam nan CSS hnuaia Hindi zirtirtute kum 10 chhung tal rawih chhunzawm leh \ul a tih thu a sawi bawk. Pu Lal Thanhawla chuan kum 1986-a remna thuthlung lo siam tawh chu chhinchhiah tlak takin Mizoramah vawn him zel a nih thu te, remna leh muanna humhim nan sum tam tak mamawh a nih thu te a sawi a, faina leh thianghlimna kawngah Mizoram sorkar chuan tun hma a\ang khan \an a lo lak tawh thu te, tuna sorkar laipuiin ek in ni lo, pawn lama inthiar awm tawh lohna tura \an a lakna chu Mizoramah tihpuitlin thuai a beisei thu a sawi bawk. Pu Lal Thanhawla chuan Pu Narendra Modi chu lo zin leh thuai turin a sawm a, a lo zin leh hunah ni hnih khat tal cham tura inbuatsaih turin a ngen nghal a ni. He inkhawm tihtawp hma lawk hian Minister of State for DoNER, Pu Jitendar Singh chuan lawmthu a sawi a, DoNER Ministry a\ang leh NEC hmang \angkaiin hmarchhak bial hmasawnna hna, chak zawka thawh tum a nih thu a sawi bawk. Hemi hnu, chawhma dar 10:50 khan PM leh Union Minister-te hian Lammual chhuahsanin |huampui Helipad an pan leh a, PM leh Doner Minister hian Meghalaya-a kawngpui hawng turin Shillong lam an pan a, Power Minister, Pu RK Singh hian Lengpui \umhmun a\angin New Delhi lam a pan a ni.
