Tun hmain Mizoram chu ram buai leh tharum thawhna hmun ni \hin mah se, tunah chuan hun khirh leh hrehawm tak a lo tawh \hinte kalsanin ram ralmuang tak a ni tawh a, India mai ni lo khawvel huap pawha muanna leh in unauna puang chhuaktu leh meichher chhitu tia hriat a ni ta a ni, a ti.
Prime Minister, Narendra Modi-a kaihhruai sorkar laipui chuan hmarchhak bial hmasawn nan leh remna an zawh theih nan chak takin hma ala tih sawiin, Pu Amith Shah chuan, an sorkar hmasak kum 5 chhung lek pawhin Mizoramin hmasawnna tam tak a nei a, sorkar laipuia Congress-in thuneihna a chan lai khan 13th Finance Commission kaltlangin Mizoram tan Rs. vbch. 19,974 pek a ni a, NDA kaihhruai sorkar thar a pian hnuah 14th Finance Commission klatlangin Mizorama hmasawnna hna hrang hrang thawh nan Rs. vbch. 42,972 zet pek a ni a ti.
Union Home Minister chuan, Mizoram Chief Minister, Pu Zoramthanga hnena alo tiam tawh angin Mizoramin a mamawh hrang hrang a hmuh theih nan leh Mizoram chu ram mawi tak a nih anga a mawina a zual zel theih nan a theih ang anga puih a inhuam thu a sawi a ni.
Union DoNER Minister, Dr. Jitendra Singh pawhin, BJP kaihhruai NDA sorkar chuan hmarchhak bial hmasawnna a ngaipawimawh tih sawiin, Union Home Minister Amith Shaha-a’n Home Minister a nih hnu reilo te-a Mizoram a tlawh hian hmarchhak bial an ngaih pawimawh zia a tilang a, tun hnai kum 5 chhunga Mizoramin hmasawnna a hmuh chu kum 65 kal taa hmasawnna aiin a tam zawk a ni a ti a, Dr. Jitendra Singh chuan, NDA Sorkar hian vote hmuhna tur politics chauh a ngaihtuah lova, hmasawnna an vei zawk niin a sawi. Thalaite eizawn nan leh hna zawn nan Hindi thiam a pawimawh thu leh Mizoram sorkar hotute ngen angin Mizoramah Hindi zirtirtu a nghet a dah turin a rang lama hmalak a ni dawn tih a sawi.
Chief Minister, Pu Zoramthanga chuan, Mizoram chu state dangte nen khaikhin chuan chak lakna kawng an nei tlem zawk a, hetihrual hian sorkar laipui kaihhruaina hnuaiah nasa zawkin hma a sawn zel ang tih a beisei tih a sawi a. Mizoram chu thlai tin reng \hat duhna hmun a nih avangin hmasawn theihna nasa tak a nei a, tun a\anga kum 10 lo awm turah chuan Mizoram chu India rama mipui thawhchhuah tam berna rama siam theih beisei a ni, a ti.
North East Handloom and Handicfart Exhibition hian tun thla ni 8 thleng a awh dawn a, hetah hian Hmarchhak state hrang hrang a\angin an thilsiam leh kutchhuak chi hrang hrang phochhuah a ni a. A hawnna inkhawmah hian Assam Finance Minister, Pu Himanta Biswa Sarma pawhin thu a sawi a ni.
Union Home Minister Amith Shaha hian chawhma dar 11:45 khan BSF Embraer thlawhnain Lengpui Airport a lo thlewng a, hetah hian Home Minister Pu Lalchamliana hovin sorkar mi pawimawh ten an lo dawngsawng a. Hemi hnu hian thlawhtheihna hmangin |huampui Helipad pan lehin, hetah hian Chief Minister, Pu Zoramthanga, Lok Sabha member, Pu C. Lalrosanga, Chief Secretary, Pu Lalnunmawia Chuaungo leh DGP Pu SBK Singh ten an lo hmuak a. Helipad a\ang hian North East Handloom & Handicrafts Exhibition neihna hmun Government Mizo High School Field a pan ding nghal a, hetah hian Health Minister Dr. R. Lalthangliana’n a lo dawngsawng a ni. Exhibition a hawn zawh hian Raj Bhavan lam panin, hetah hian Chief Minister, Pu Zoramthanga nen an inkawm bakah NGO Coordination Committee hruaitute a kawm bawk.
