Joint NGO Coordination Committee hruaitute hnen a\anga Zonet thudawn danin, an inkawmnaah hian Union Home Minister chuan, Citizenship Amednment Bill hi Mizo mipuite tan a hlauh awm loh tur thu sawiin, kumin October ni 5-a Mizoram alo tlawh \uma a lo sawi tawh angin Mizoramin inhung bikna dan a neih mek Inner Line Permit chu thuamchak a, tun aia tihchangtlun a nih tur thu a sawi a. Mizoram ramri venghim turin Mizo \halai hlang awmna BSF leh CRPF din a ni ang a, Assam Sorkar-in a kalpui tawh National Register of Citizens chu Mizoramah pawh kalpui tur niin, hetah hian tehfung atan kum 1971-a Mizorama awm tawhte hman a nih tur thu a sawi.
Mizoram aiawhte chuan Sorkar laipuiin ruahmanna hrang hrang a neihte chu \ha viau mah se, CAB kaltlangpui chu an remtih theih loh thu leh Sorkar laipui hotuten CAB dodal nana lungawi lohna lantir tawh lo tura an ngenna pawh tihhlawhtlin ngawt theih a nih loh thu hrilhin, an thu ngaihtuah ho chu Aizawl lamah inrawn khawma an sawi ho ve phawt tur thu an hrilh a. Sorkar laipuiin ILP thuam chak a tum thu a sawi chungchangah pawh ILP leh CAB chuan inzawmna a neih loh avangin ILP thuam chak a nih avanga ngaih tih \hat ngawt chi nia an hriat loh thu an sawi a ni.
An inbiaknaah hian Sorkar laipui hotute chuan Mizoram mipui duh dana Tripura-a awm mek Tuikuk-te Mizorama hruaikir tumna chu chhunzawm a nih loh tur thu an sawi a. Hei hi lawmawm viau mah se, tuna an inbiakna thupui ber a nih loh avangin lungawi phah nan hman an tum lo tih NGO hruaitute chuan an sawi bawk.
He inbiaknaah hian Joint NGO aiawhin Central YMA President, Pu Vanlalruata, MZP president, B. vanlalatana, general Secretary, Lalnunmawia Pautu leh NESO Council member, Ricky Lalbiakmawia an tel a. Political Party aiawh tel te chu MNF aiawh Minister, Pu TJ. Lalnuntluanga, MPCC a\angin Pu Lalhmachhuana, ZPM a\angin Secretary General, Pu K. Sapdanga, BJP president, Prof. JV Hluna leh NPP General Secretary, Dr. Lalrina Jahau-te an tel a ni.
