United Nations Secretary-General, Antonio Guterres-a’n North Korea chu nuclear bomb leh missile a en chhin fo avangin na takin a dem a, Korea ram leh a chhehvel chu nuclear ralthuam awm lohna hmuna siam tumna chu a hlawhtlin theih nan theihtawp chhuah zel a duh thu a sawi rualin, sipai chakna hmanga North Korea beih erawh chu tha a tih loh thu a sawi. Puan tawh angin, North Korea chuan Pathianni khan nuclear bomb chi khat, missile hmanga kah chhuah theih tura siam, hydrogen bomb a en chhin a, a thil tih avang hian khawvel ram hrang hrangin an dem nasa hle a, US phei chuan tun aia na zawka hrek a tiam a ni. UN hotu hian North Korea thil tih chu tul hauh lova mi maktaduai eng emaw zat tiralkheltu nia sawiin, a thil tih atthlak tak hian harsatna hrang hrangin a tlakbuak mek, North Korea mipuite chungah pawh nghawng tha lo tak a nei thei dawn niin a sawi a, an dikna leh chanvo palzatna lian tak a ni tih a sawi bawk.
Vawiin khan South Korea President, Moon Jae In-a leh Russia President, Vladimir Putin-a’n North Korea chungchang buaina hi an sawi dun a, Pu Moon-a hian North Korea-in nuclear ralthuam en chhin hi a tihtawp loh chuan Korea ram leh a chhehvel chu hmun him lo-ah a chang dawn niin a sawi a, nimin khan Pu Moon-a hian North Korea hrekna thar chu UN-in ngaihtuah thuai se a duh thu a sawi a ni. Puan tawh angin, Thawhtanni khan US sorkar palai, Nikki Haley-i chuan North Korea hruaitu lu, Kim Jong Un-a chu indona cho chhuah tumah a puh a, ram 15 telna, UN Security Council chu tun aia nasa zawka North Korea hrekna tur siam thuai turin a nawr nghal a ni.
