UN-in North Korea a hrekna China-in thlawp tum

China Foreign Minister, Wang Yi-a’n North Korea ram chu United Nations-in na zawka a hrek chuan, China-in UN thil tih chu a thlawp tur thu a sawi a, UN duh dan palzuta North Korea-in nuclear bomb a en chhin avangin China pawhin UN Security Council kal tlanga hrem tha a ti niin a sawi bawk. China Foreign Minister chuan, North Korea thunun nan hian khuahkhirhna leh hrekna ringawt a tawk lo nia sawiin, buaina ching fel tur chuan awmze neia indawr a ngai niin a sawi a, China hi UN Security Council member nghet a nih angin, veto power a nei a, China hian a thian leh ram thenawm, North Korea hrekna hi a pawm tak tak dawn em tih erawh chu a la sawi theih loh a ni. US President, Donald Trump-a chuan North Korea thil tih chu America ramin a namnul mai mai tawh dawn lo tih a sawi a, sipai chakna hmanga North Korea beih nghal rum rum erawh chu a la tum lo niin a sawi. White House chuan Trump-a leh China President Xi Jinping-a chuan, phone-a an inbiaknaah Korea ram leh a chhehvel chu nuclear ralthuam awm lohna hmuna siam an tiam niin a sawi a, President Trump-a hian thuthar la khawmtute hnenah North Korea chungchanga buainaah hian China President hian thil tum a nei tih leh, a thil tum hi a hlen theih dawn leh dawn loh chu a hriat a la ni dawn tih a sawi a, Korea ram leh a chhehvela thil thlengah hian ngawih mai mai a tum lo tih sawiin, President Xi Jingping-a pawhin hei hi a pawmpui niin a sawi. North Korea beih a tum leh tum loh zawhna chhangin, Trump-a hian sipai chakna hman chu a thil duh ber ni lo mah se, tunah hi chuan engmah a la sawi theih rih lo niin a sawi bawk.