Report tawi an buatsaihah Yemen sorkar sipai leh Saudi sorkar kaihhruaia anmahni thlawptu tangrual sipaite leh an beih ber Houthi hel pawl te chuan civil mite himna tur an ngaihthah hle tih an tarlang a, School, damdawiin leh sumdawnna hmun bomb hmanga beih a nih dan te tarlangin civil mi sang telin an thih phah tih an sawi a, tangrual sipaiten thlawhna hmanga hel pawlte an beihna leh lawngchawlh hmun an khar lui te pawh dan indona kaihhnawiha pawi khawihna a tling tih an tarlang bawk. UN Human Rights mithiamte hian an report kimchang chu UN Human Rights Council ah thla thar khian an pharh ang.
Thawhtanni khan tangrual sipaite hian UN chu awn lam nei taka report siamah an puh a, Houthi hel pawlten an thunun chin thlawhna hmanga an beihnaah Yemen mi tam tak an thih bakah mithi zingah hian naupangte pawh an tel tih UN chuan a sawi a, tangrual pawl thupuangtu Turki
al-Malki chuan UN report chu hel pawl te thusawi behchhana siam niin a sawi.
Hetihlai hian hel pawlten an luah mek, Sana khawpui leh a bul hnaia thlawhna tumhmunte chu Saudi Arabia kaihhruai tangrual sipaite hian thlawhna hmangin an bei leh chiam bawk. Saudi Arabia leh a thurualpuite hian kum 2015 atang khan Houthi hel pawlte lakah hian beihpui an lo thlak chho tawh a ni.
