Thuneitute sawi dan chuan Saudi Consulate-a Khashoggi-a a kal ni, October ni 2 khan Saudi mi 15 an awm ve a, heng mi 15 te hi he ni hian Istanbul hi an thleng a, tlai lamah an ramah an haw leh nghal a, an ni hi Khashoggi-a thahna ah an inhnamhnawih rin a ni. Turkey police-te chuan heng mi te hi an chhui mek a, an rama Saudi Arabia palai, Consul General Moahmmaed al-Otaibi chenna in thlengin an chhui dawn a, Saudi Consulate-a Khashoggi-a a luh hnu darkar hnih velah Otaibi chenna inah hian car-in mi 15 pawikhawihtu nia rinhlelhte hi an kal nia hriat a ni bawk a ni.
Puan tawh angin Khashoggi hian Saudi Consulate hi reilote hnuah a chhuahsan leh mai niin Saudi sorkar lam chuan an sawi a, a chunga thil thleng an hriat bik loh thu leh a himna an ngaihtuah ve tho thu an sawi tawh a, mahse Khashoggi-a nupui hual Hatice Cengiz chuan Consulate pawnah a lo nghah thu leh a lo let loh thu a sawi ve thung a, Khashoggi hian Cengiz nena an inneih theihna tur lehkha pawimawh buaipui turin Consulate hi a tlawh tih a sawi bawk a, Cengiz hian Khashoggi chin hriatchhuah a nih theih nan US President Trump-a \anpuina thawhlehni lamah khan The Washington Post kaltlangin a dil a ni.
Trump leh Secretary of State Mike Pompeo te chuan thawh\anni lamah khan Khashoggi chin chhui chhuah ngei an phut thu an lo sawi tawh a, Trump chuan a thil hriatte chu a lawmawm a tih loh thu leh a rang lama chinfel ngei a nih a beisei thu a sawi a ni.
