Khaw lum chungchang hi MIRSAC leh MISTIC Scientist te pawhin vawiin khan Aizawlah an sawiho a, Chief Scientific Officer, Dr. RK Lallianthanga sawi dan chuan niminpiaha celsius degree 35.2 kai chho leh vawiina 36.3 ai hian kum 2017 April ni 13-a celsius degree 36.5 chho chu tunhnaia Mizorama a lum ber ni a ni. Hetihlai hian Economics and Statistics Dept in Meteorological data of Mizoram 2018 tih lehkhabu an tih chhuah ah chuan kum 2017 khan May thlaa Celcius degree 30.3 chu khaw lum ni ber anga tarlan a ni thung a, khawlum zawng hi chhin chhiah dan a inan loh avangin tunlaia khaw lum hi kum engemawzat kalta chhunga a lum zual lai ber a ni em tih finfiahna a awm thei lo a ni.
Vawiina scientist rualten khaw lum chho zel chungchang an sawi honaah hian chief scientific officer Dr. RK Lallianthanga chuan khawvel sik leh sa a danglam zel rualin Mizoramah pawh khua a lum telh telh a, chu chuan nitin nunah leh kuthnathawktute ei leh bar zawn kawngah nghawng a nei chho mek a ni a ti. Meterological Centre incharge Scientific Officer, Pu K. Lalrammuana pawhin a kum tela khua a lum telh telh rualin a vawh zawng pawh a vawt zual zel bawk tih a sawi.
