Tunlaia Online hmanga sum peipun theihna nia sawi awm mek chu a him lo tih hre turin Mizoram Police-ten mipuite an hriattir. Company nia insawi thenkhat chuan thil siamchhuah mumal nei si lovin Direct Marketing Business Model hmangin an hnuaia inziaklut tur an zawng thin a, chung mite chuan hmanraw hrang hrang hmanga midang an bum thin avangin mipuite chu hetiang laka fimkhur turin an ngen a ni. Heng Company dik lote sum lakluhna ber chu member thar an lakluh atangin a ni a, an hnena inziaklutte chu a hming lekin hnathawh tur an bituk sak thin tih Police te chuan an sawi a, hetiang sumdawnna hi tun hmaa Mizoram lar vak tawh chiahpuam nen khan a inang nia sawiin, hetiang sumdawnna hi rei tak kalpui theih a nih loh avangin an tlukchhiat leh mai thin thu te, dan lova midang hnen atanga sum lak chu RBI Act, Company Act leh MPID Act kalh a nih thu leh sumdawnna dik lo hmanga member ni tura midang hnen atanga pawisa laksak chu The Prize and Money Circulation Scheme (Banning) Act, 1978 kalh a nih thu te leh a bawhchhiate chu kum 3 thleng lung in tan tir theih a ni tih hre tur tein mipuite an chah a ni.
