Health Dept-a Integrated Disease Surveillance Programme IDSP State Nodal Officer Dr Pachuau Lalmalsawma hovin State Entomologist Dr Lalfakzuala Pautu leh mithiam dangten Thenzawla Rannung sehna leng mek dinhmun hi an enfiah a, nizan lamah vantlang inkhawm kova, mipuite zirtirna beihpui an thlak hnuin vawiin khan Jt YMA Hall ah a thlawna inentirna an buatsaih leh a, inentir tura hming ziak lut mi 409 zingah he natna kai ni thei awma ngaih mi 203 te thisen endik a ni a, an zinga 22 chuan natna hrik hi an pai tih hmuhchhuah a ni. Heti hian tunhnaia Thenzawl CHC in rannung seh natna vei a lo hmuhchhuah tawh 78 te nen he natna hrik pai hmuh chhuah zat chu 100 chiah chiah an tling ta a ni. A thlawna inentirna buatsaihah hian Serchhip Damdawiin a\anga thawk chhuak doctor te leh Thenzawl Ayush Hospital-a doctor leh thawktu dangte pawhin dam lo te an en a ni.
Dr Pachuau Lalmalsawma chuan Thenzawl CHC in he natna darh zel tur ven kawngah hma an lo lak \hat avangin Thenzawla rannung seh natna dar mek dinhmun hi hlauhthawnawm lutuk a ni tawh lo tih Zonet zawhna chhangin a sawi a, damdawi leh a endikna hmanrua te an hnut chhiah tih sawiin natna darh zel tur pawh a ziaawm chhoh a rin thu a sawi. Dr Pachuau Lalmalsawma chuan rannung seh natna chu Mizoramah thil thar a ni tawh lo tih a sawi a, thihpui lo awm tawhte chu enkawl har vang an ni tlangpui a, Khawsik nei reng reng chuan a rang lama inenkawl a \ha a ni a ti. Mithiam rualten damlo te thisen an lak \henkhat chu chiang zawka zirchian turin ICMR Dibrugarh-ah thawn a ni ang.
