Champhai North bialah hian candidate te zinga affidavit thehluh khin letna, counter affidavit a luh avangin, scrutiny hi naktuka chhunzawm tura dah a ni thung. PRISM Party chuan Assembly inthlanpuia din tuma nomination file mi 28 in affidavit an siam danah tih dik loh an nei nia sawiin an lakah counter affidavit hi Zirtawpni khan an thehlut a ni. Counter Affidavit a luh avanga vawiina chinfel ve hman tak loh, Champhai North ah hian Candidate 6 an awm a ni.
Assembly inthlanpui Vote thlak ni tura ruat ni 28-ah chuan zing dar 7 a\anga tlai dar 4 thleng vote thlak theih a ni ang a, vote tla te chu State danga Assembly inthlanna vote tla chhiar rualin December ni 11-ah chhiar a ni ang a, inthlanna pumpui chu December ni 13-ah zawhfel a ni ang.
Tun dinhmunah candidate zingah hian hmeichhe candidate 18 an awm a, a bak 204 te mipa an ni a, amaherawhchu, an zingah hian bial hniha ding, Chief Minister, Pu Lal Thanhawla, ZPM Chief Minister candidate, Pu Lalduhoma, PRISM President, Pu Vanlalruata leh NCP Mizoram President, Pu Lalawmpuia Chhangte te bakah Zoramthar hruaitu Pu Zaichhawna Hlawndo leh a fanute pahnih, Lalhrilzeli Hlawndo leh Lalruatfeli Hlawndo te pawh an tel a ni.
Tun dinhmuna candidate tlemna bial 12-ah te chuan candidate 4 \heuh an awm a, chungte chu Chalfilh, Aizawl West III, Aizawl South II, South Tuipui, Lunglei North, Lunglei East, Lunglei South, Lunglei West, West Tuipui, Tuichawng, Siaha leh Palak te a ni. Candidate tamna ber bial pahnih chu Hachhek leh Dampa a ni a, heng bialah te hian candidate 8 ve ve an awm a ni. A dawttu candidate 7 ve ve awmna bial hnihte chu Mamit leh Tuirial bial a ni a, candidate 6 awmna bial 12 a awm a, chungte chu Kolasib, |awi, Aizawl North I, Aizawl North II, Aizawl East I, Aizawl East II, Aizawl West I, Aizawl West II, Aizawl South I, Champhai North, Tuikum leh Hrangturzo te a ni. A bak zawng bial 6-ah te chuan candidate 5 \heuh an awm a ni.
Candidate ding tlang tur awmzat chu inhnuhdawh theihna ni hnuhnung ber tun thla ni 14-a hun tiam ral hnuah chauh a hriat theih dawn a ni.
