Bawngkawn Police Station kawta Police duty-te leh mi thenkhat intihbuaina video darh leh a hnua social media lama thu thehdarhah police zu rui a awm ni awma sawi a ni a, hemi chungchang hi Mizoram Police Subordinate Officers’ Association hian Zirtawpni khan an sawiho a, uluk taka an zirchian hnuah video thehdarha police zurui ni awma sawi hi Constable Zonunmawia a ni an ti a, amah hi zu leh ruihtheih thila buai lo, City Police zinga discipline \ha leh rintlak tak a ni zawk tih an sawi.
Tleirawl rual buaina siamtua puhte Bawngkawn PS-a hruai an nih lai hian P.S kawtah SRS member leh mi engngemaw zat an pung khawm tawh tih MPSOA hian an sawi a, mahni Office kawt kaia buaina lian zawk a thlen belh hlauvin Bawngkawn PS duty-te hian pungkhawm te bengdaih tumin, buaina leh bengchheng siam lo turin an hrilh a. Hetih laia Duty Officer te hi mizo ni lo an nih bawk avangin an thupek angin Constable duty-ten buaina leh bengchheng siamtute hi an thiam dan leh tihdan \hin pangngaiin an khap a ni an ti. Hetihlai hian pungkhawm lam a\anga zu rim nam anga sawi leh Police Station chhung luh chilha a service tichhe thei an nih thu hial vauna a awm tak avangin Bawngkawn P.S O/C leh Duty Officer-te chuan zu ruih leh ruih loh endikna Breath Analyser an ham tir a, a result-ah chuan zu far khat pawh a in lo tih finfiah a ni an ti a. Hetianga zu rim nam chunga duty-a an puh thu leh Breath Analyser ham tir a nih thu hi Bawngkawn Police Station-a thil thleng pawimawh chhinchhiahna lehkhabu ah a duh apiang en theihin a awm a ni an ti.
MPSOA hian hetianga police zu rui duty-a puhna hi Central YMA SRS te leh Police te thawhhona kara hem thlak tumna nia an ngaih thu an sawi.
