Tukin zing dar 2:15 vela Aizawl atanga Zokhawthar pan, maxi cab pakhat chesualah mi pakhat a thi a. Champhai Tuipui atanga Champhai lam km 3 vela hlaah Maxi Cab hi kawng thlang ah a tlan liam a, metre 30 vel a lum a ni. Maxi cab ah hian a khalhtu nen mi 10 an chuang a, an vaiin an hliam vek a, an zingah pakhat Cheuluaia kum 23, Thangkira, Tlangkawi Myanmar fapa chu Champhai District Hospital panpui a nih laiin a hliam tuar lovin a boral a, midang pathum, Nawlkunga, Lalpekhlui leh Ramropuia te chu hliam nazual deuh an ni a, Champhai District Hospital ah enkawl an ni.
Chetsualna thlen chhan hi Driver mutthluk vang nih rin a ni a, Tuipui khua mi tlawmngai ten chhanchhuah hna an thawk a, Champhai Police te pawh a hmunah kalin chetsualna thlen dan an enfiah a ni. Lirthei in a phurh bungrua te hi a theih ang ang a thiar chhuah a ni a, Champhai Tuipui ah dahkhawm a ni.
