Sesawng leh Khawruhlian inkara Tuirini lei dawh lai nimin piah zinga chim ta bulah PWD chuan kumin fur ruahtui tlak hmaa zawh hman turin lei thar dawh a tum. Hemi chungchanga PWD Minister, Pu Lal Thanzara hnen atanga ZONET thu dawn danin he lei dawh tum hi feet 160 vela sei a ni ang a, a dawh nan hian NEDP sum dil tum a ni a, tuna lei dawh chhunga hman tura lei chhak lama lui kanna atana hman lailawk tur lei dawh chu fur ruahsur hunah a hman theih loh nghal dawn avangin Khawruhlian, Darlawn, Suangpuilawn leh Sakawrdai tlang dunga khua ten nitin khawsakna mamawh an tlak chham loh nan he hna hi hmanhmawh taka beihpuithlaka thawh a ngai niin a sawi a ni. Hetihlai hian Chief Engineer Highway, Pu K. Lalsawmvela chuan ZONET zawhna chhangin he lei dawh lai chim ta hi nimin khan a hmunah Engineer-in-Chief, Pu R. Vanlaltluanga hovin an enfiah niin a sawi a, hemi rual hian fur ruahtui tlak hmaa lei dawhna tur hmun te pawh an en tel a, vawiin khan a hmun chik zawka enfiah turin surveyor team kal tir an ni a, an thil hmuh dan chu rang takin sorkarah hriattir a ni ang a, chuta tang chuan lei thar dawh dan tur ngaihtuah zui a ni dawn niin a sawi a ni. Zawhna dang chhangin Highway Chief Engineer chuan lei chim ta chu Inquiry Commission-in a endik fel hma chuan thiah theih a ni dawn lo niin a sawi a, tun dinhmunah lei thar dawhna tur hmanrua lei khawl sa an neih loh avangin Chhingchhipa kawng chhuat bal laia lei an dawh chu a helna kawng dang siam zawh tawh a nih avangin thiah theihin a awm tawh a, he lei dawhna hmanrua hi thiata, Tuirini lei dawh nan a hman zui theih dawn niin a sawi a ni.
Thawhlehnia Sesawng leh Khawruhlian inkara Tuirini lei dawh mek chim chungchang hi vawiin khan Political Party 3- MNF, MPP leh PRISM hruaituten an thlir hova, he thil thlengah hian PWD Minister, Pu Lal Thanzara chu mawhphurhna laa bang tura an phut thu an sawi a. Tuirini lei chim ta chu dawh a nih tan atanga vawiin thlenga a changtu Minister-in a tlawh lo te, chhiatna a thlen tawh hnuah pawh a la tlawh lo te, chhiatna thleng pawi a tih thu tawngkam khat pawh a la sawi lo leh he chhiatna vanga nunna hial chan an awm laia mithi vuinaah pawh a kal lo te chu mak an tih thu sawiin, Pu Lal Thanzara chu a Department enkawl te vil hnehloah an puh a. Hetiang bawk hian Chalfilh bialtu MLA, Dr. Ngurdingliana’n pawhin vawiin thlenga lei chimna hmun la tlawh lo leh he chhiatna vang thi vuinaa a kal lo chu an dem thu an sawi bawk. Party 3 hotute chuan, Tuirinia lei dawh lai chim avang hian khaw engemawzat chu harsatna tawk mai thei an ni an ti a, Chalfilh leh Tuivawl biala chengten ni tin mamawh hrang hrangah harsatna an tawh loh nan fur ruahtui tlak hmaa mipui mamawh khawp chhekkhawl turin Sorkar an phut a, Tuirini lei chu NEDP atana sum dah cheng vaibelchhe 750 atanga a rang thei ang bera siam tha tur leh sum awm sain a daih lo a nih pawha sum awm theite ngaihtuah turin sorkar an phut a ni. He chhiatna thleng vanga nunna chan Pu HC. Lalfakzuala Sesawng chu cheng nuai 10 a ral tur leh hliam Laltleipuia Hmar chu a in enkawlna senso zawng zawng tumsak a, zangna dawmna pe tura Sorkar an phut thu an sawi bawk.
Mizoram Hmar Students’ Association, Sinlung Hills Joint Head Quarters pawhin an tlangdung hnukpui leh innghahna Tuirini lei dawh lai a chim chu pawi an tih thu an sawi a. He lei chim vanga Pu HC Lalfakzuala, Sesawng khuain nunna a chan leh an zirlaipui Laltleipuia Hmar-in hliam a tuar chu pawi an tih thu an sawi a ni. Hmar zirlai pawl chuan, Chalfilh leh Tuivawl biala chengten harsatna an tawh loh nan fur thlen hma ngeia lei hi siam tha turin Sorkar an ngen a, hei hi an tihhlawhtling thei lo a nih chuan fur thlen hunah zirlai leh zirna in hrang hrang bakah an tlangdung mipuiin harsatna an tawh loh dan tur ruahman sak turin sorkar an ngen a. New Vervek atanga Sakawrdai, Zohmun, Mauchar, Saiphai leh Bagha kalna kawngpui NH No.306A chu chhim lam leh khawchhak tlangdungte tana chak lakna pawimawh a nih theih nan a rang thei ang bera siam that an duh thu an sawi bawk.
