Kawlphetha megawatt 60 pe chhuak thei tura NEEPCO-in a siam mek, Tuirial Hydel Project chuan tun thla ni 14 zan leh ni 18 khan Bawktlanga 132KV Sub Station-ah a kawlphetha siam chhuah engemawzat hun reilote chhung a chhung lut. Tun thla ni 14 zan khan minute 15 chhung, megawatt 10 a chhung lut a, ni 18 tlaiah khan megawatt 5 vela a bul tanin, tlai dar 6-ah chuan megawatt 26 thleng a chhung lut a, amaherawhchu, a pek chhuah chhung hi darkar khat chuang hret chauh a ni a, hei hi an khawl hnathawh dan en chhinna niin Power & Electricity Deptt. Engineer-in-Chief, Pu L. Pachuau chuan a sawi. Zawhna dang chhangin P&E Deptt. hotute chuan, Tuirial Hydel Project hawn hun tur hi sawi chian theih a la ni lova, kawlphetha megawatt 30 pe chhuak thei khawl pahnih bun tur zinga pakhat chu bun zawh a nih hnuah tunlai hian a hnathawh dan en chhina, siam that ngai lai siam that mek a ni a, khawl dang pakhat erawh chu kumin October thla velah bun an tum chauh niin Deptt. hotute chuan an sawi.
Hetih lai hian, Chalfilh Group YMA Secretary, Pu Ngurthansanga Sailo chuan Tuirial khuah li-in ram zau tak a chim tawh avangin lui kam ngawa ramsate chu Tuirial hnar lama North Serzawl leh Chhanchhuahna khawpui velah an tlanchhia niin a sawi a, heng ramsate hi duat taka enkawl leh an humhalh lai a ni tih sawiin, kap lo tur leh tina lo turin mipuite a ngen a ni.
