Lawngtlai atanga Tui Ferry thleng, Kilometres 10 hi kawng awmsa laih zauh ngai lai te lai zauvin, Blacktop tur a ni a, he lai kawng siam nan hian North East Special Infrastructure Development Scheme (NESIDS) atangin Cheng Nuai 2587 ruahman a ni. Contractor hian nikum October thla atang khan an thawk tan a, Kilometres 3 vel an laih hnuah, laih hmabaka ram neitu ten zangnadawmna an hmuh hma chuan an ram laih an remtih loh vangin, harsatna an tawk tih an sawi.
Kawng siamna tur sum ruahmanah hian zangnadawmna pek tur ruahman tel a nih loh laiin, State Sorkar chuan a thlawna mi ram laksak ngawt chu thil tih chiah ngaih loh avangin, lawmthu sawina atan pawisa hi pek turin ruahmanna an siam mek tih kawng viltu PWD hotute chuan an sawi.
Vinco Construction te hian he kawnga Chhimtuipui lei kanna tur lei chu an dawh lailawk mek a, he kawngah hian Lawngtlai leh Siaha inkar chu kawngpui hmanlai aiin Kilometres 40 zetin a tawi zawk a ni.
