An inkawmnaah hian Central YMA hruaitute chuan North Chhimluanga Tuikuk helpawl kalte hi kum 1999-a Bung\huam tlangval Zarzokima thawhtute zinga an hruaitu Lal\hazuala nia an hriat thu leh heng mite hian Tuikuk mipuite chu MNF vote vek turin an hrilh nia hriat a nih thu an sawi a. Tun hma a\angin MNF chu BJP nena sawizawm an ni \hin tih sawiin, Central YMA hruaitute chuan tun hnaia BJP-in an Campaign-naah Tuikuk-te chu Autonomous District Council pek nia hriat a nih thu leh hei hi thil dik a nih chuan Nationalist Party, MNF tan thil \ha lo tak a ni thei dawn nia an hriat thu sawiin, MNF chu Political Party dang nen inremna an siam chungchangah fimkhur lehzual turin hma la se an duh thu an hrilh a, Chakma chungchangah pawh Joint NGO Coordination Committee-in Chakma candidate dah lo tura a ngenna chhang hmasatu chu MNF an nih thu leh lawmawm an tih thu sawiin, Central YMA hruaitute chuan MNF chu Mizo hnam behchhana din Political Party an nih anga Chakma candidate hi dah lo tlang ngam tura an duh thu leh Chakma leh Tuikuk chungchangah \an ho a ngaih thu sawiin, chibing politics-in Mizoram a luhchilh loh nana venpui turin MNF hruaitute chu an ngen a ni.
MNF President, Pu Zoramthanga chuan North Chhimluanga thil thleng chungchang chu MNF General Headquarters-in a hriatpui lo tih YMA hruaitute chu a hrilh a. Kolasib Block hruaitute hnen a\anga thu an dawn danin, he thil hi Aizawl lama Bru Welfare inti hruaitute hmalakna nia hriat a nih thu leh MNF Party chuan hetianga a rawlrala chetna hi a duh lo tih sawiin, hel rawngkai puihna reng reng an duh lova, Party dangte pawhin helpawl hi thawhpui lo se an duh a, hei hi ven a nih theih nan tlawmngai pawlte nen pawh \anrual a \ul hle a ni a ti. Pu Zoramthanga chuan Chakma candidate nei lo tura Jt. NGO ngenna chu a chhang hmasa ber an ni tih sawiin hetihrual hian Party dangin Candidate an dah tho chuan an tan dah loh ve ngawt chu thil tihchi a ni ang em tih chu an ngaihtuahna a nih thu sawiin MNF party chu Chakma Autonomous District Council \hiah tuma hma lo la tawh a ni tih a sawi bawk. MNF President chuan, Mizoram leh hnam himna tura hnathawh chu an Party thil tum ber a ni tih Central YMA hruaitute chu a lo hrilh a ni. North Chhimluang Tuikuk helpawl nia hriatten MNF Campaign puia mipuite an vau nia sawi chungchang hi a bialtu Bairabi Police OC chuan a hmuna kalin a enfiah tawh nia thudawn a ni.
Nimin pawh khan Central YMA hruaitute chuan BJP Office-ah lengin inthlanna dik leh felfai neih theih nan dan bawhchhe lo turin an party hruaitute an ngen.
Hemi rual hian ram chhung hmun danga Campaign laia an tih \hin ang thil \henkhat, Mizoram tana \halo te chu tilo turin an ngen. An thil sawi chhuah zingah chuan sum sem therhlo dang sem loh, Bru leh hnam dangte tan Autonomous District Council tiam loh, vote thlak tur phurh khawm loh leh hmanraw thianghlim lo hman loh te a tel a ni. Central YMA hruaitute chuan Mizoram inthlanpui neih tur kaihhnawihah leh BJP chet lak dan tur chungchangah tunhnai khan Silchar-ah RSS-te intawhkhawm a awm nia thuthang awm pawh an zawtfiah a, inthlanna boruak thianghlim, felfai, muanawm leh langtlang thei tichhe thei zawnga thil tih an duhloh thu an hrilh a ni.
