Hemi puala inkhawm an veng YMA Hall-a buatsaih hi an Branch President, Pu Joseph Lalmalsawma’n a kaihruai a, a hmanpuitu Bialtu MLA Pu Lalruatkima chuan, Tuikual South chu sorkar hmun pawimawh awmna a nih avangin sorkar hna lian thawk mi tam tak awmna a ni a, competitive examna hrang hrangah pawh hming lang tam zingah an tel ziah a ni tih sawiin, Tuikual South chu veng entawntlak niin a sawi a ni. Pu Lalruatkima chuan, tun hnaiah Mizo lehkhathiamten hnamdangte an phak ta lo tih theih turin thil a awm chu pawi a tih thu a sawi a, zirna kawngah nasa zawka \an la tura zirlaite fuihin anmahni chu Mizo hnam humhalh kawnga pawimawh hmasa tur zinga mi an ni tih a hrilh a, Central Service lamah pawh Mizote hming a lang ta meuh lo chu inenfiahna tur niin a sawi bawk. Pu Lalruatkima chuan Mizoram sorkar hnuaia Secretary, DC leh Department hotuah hnamdang an tam ta chu a ngaihmawhawm tih sawiin, nasa taka \an la turin Mizo \halai lehkhathiamte a fuih a, zirlai hlawhtlinna changte chu khawi hmunah pawh zirna chhunzawm se ram leh hnam hmangaihna thinlung pu chunga zir tur leh Zonun zemawi chhawm nung zel turin a fuih a ni.
He inkhawmah hian Central YMA President, Pu Vanlalruata pawhin thusawiin zirlaite chu awmze neia nun hmang turin a fuih a, an hlawhtlinna leh thiamna chu anmahni tan chauh ni lo, ram leh hnam tan a ni tih hre reng turin a chah a ni. Central YMA President chuan, Mizoram chu ram pumah ziak leh chhiar tamna tia sawi ni \hin mah se thiamna sang zawk lamah a hnufual niin a sawi a, tunlaia \halai lehkhathiamte chu tun hmalama an rual u te hnung zui pha ta lo nia sawiin, Central Service leh hna lian thawk thei tura examna bei tur leh ngawrh zawka lehkha zir turin a fuih a ni. Pu Vanlalruata chuan, Nu leh pate pawh an fate zirna ngai pawimawh tur leh lehkha an zir \hat theihna tur a ni phawt chuan an thawh ai lo thawhsak hreh lo tur te, ram leh hnam him nan kawng hrang hranga \an ho a \ul thu te a sawi bawk a ni.
Tuikual South Branch YMA-in zirlai an chawimawi tak te hi mi 109 an ni a, chawimawina thuziak pek an nih bakah bialtu MLA-in Pu Remkunga siam English Mizo Dictionary a pe \heuh bawk a ni. He inkhawmah hian tun hnaia Thailand-a Karate championship-a tel Gold Medal latu, David Lalrinchhana leh Asst. Coach Lalramthara te chu chawimawina thuziak an hlan bawk.
