Zan hnih riaka Mizoram rawn tlawhtu, Union Minister of State for Drinking Water & Sanitation Pu Ramesh Chandappa Jigajinagi chuan tui thianghlim intur mipuiten hnianghnara an hmuh vek theihna tur leh faina leh thianghlimna kawnga chak zawka hmalak anih theih nan Union Secretary kaihhruai Team Mizorama tirh thuai anih tur thu a sawi.
Pu Ramesh Chandappa hian vawiin khan Aizawlah PHE hotute kawmin Mizorama tui thianghlim sem dan leh Swachh Bharat Mission (Gramin) hnuaia hmalak dante a sawipui a. Mizoram mipuiten tuithianghlim hnianghnar zawk an hmuh theih nan leh faina leh thianghlimna kawnga chak zawka hmalak a nih theih nan hun remchang hmasa berah Union Secretary kaihhruai Team Mizoramah tirh a nih tur thu a sawi a, PHE hotute chu an harsatna neihte sutkian dan tur chipchiar taka lo sawipui turin a chah a ni. Pu Ramesh Chandappa Jigajinagi hian, kumin March thlaah Mizoram chu pawn lera inthiar awm lohna, Open Defecation Free State-a puan a ni thei tur chu lawmawm a tih thu a sawi a, bawlhhlawh sawngbawl kawngah erawh nasa zawka tanlak a la ngai tih sawiin, ruahtui khawl tura Department leh mipui hmalakna chu entawntlak khawpa tha nia a hriat thu a sawi a, nasa lehzuala kalpui turin sorkar laipui chu tanpuina pe turin a inhuam tih pawh sawiin, Department hotute chu hemi atana Project thehlut turin a hrilh nghal a ni.
PHE Minister, Pu Zodintluanga pawhin, kum 25 kalta atang khan Mizoramah faina lamah hmalak tan a ni tawh tih a sawi a, tuna sorkar laipuiin ‘Swacch Bharat’ a kalpui mek pawh mipuiten an zawm tha hle nia sawiin, rampuma state fai ber nih tumin sorkar, tlawmngai pawl leh mipui tang hovin chak taka hmalak mek zel a ni a ti. Pu Zodintluanga chuan, Mizorama khaw fai bera thlan Biate khua chu Asia khawmualpuia khaw fai ber ni tura tanlak mek a nih thu leh khawlaia bawlhhlawh paihte hremna tur dan pawh siam anih thu a sawi a, a kenkawh chu Aizawl Municipal Corporation kutah dah tum a nih thu a sawi. He inkawmna hi PHE Secretary, Pu KT Beicho-in a kaihruai a; PHE CE, Pu Lallunghnema leh SE (Monitoring), Pu Anoop Chhetri-in an Department hmalakna hrang hrang an sawifiah a ni.
Pu Ramesh Chandappa Jigajinagi hian nimina Lengpui tumhmun a lo thlen hnuah Muallungthu, Falkawn leh Melriata Public Health Engineering Department-in National Rural Drinking Water Programme hmanga tui dah khawlna tur a siam mek leh Swachh Bharat Mission (Gramin) hmanga mimal inthiarna leh vantlang inthiarna hmun siamte a enfiah nghal a. Muallungthuah hian mimal inthiarna 98, Falkawnah 32 leh Melriatah 21 siam a ni a. Aizawl District bikah Swachh Bharat Mission (Gramin) hnuaiah inthiarna (toilet) 1517 siam tawh niin, Aizawl District chu pawn lera inthiar awm lohna, Open Defecation Free a puan a ni tawh a ni. Nimina Union Minister-in Muallungthu, Falkawn leh Melriata Sorkar hmalakna a tlawhnaah hian PHE Department hotute leh heng khaw 3-a Village Council hruaituten an tawiawm a ni.
Union Minister of State for Drinking Water & Sanitation, Pu Ramesh Chandappa Jigajinaji hian nimintlai vek khan Larsap, Lt. Gen. Nirbhay Sharma chu a chenna Raj Bhavan-ah kawmin thil pawimawh hrang hrang an sawi dun a. An inkawmnaah hian Larsap chuan, faina chu Mizote nunphunga bet tlat a nih thu leh District tinte chu pawn lera inthiar awm lohna, Open Defecation Free-a puan a nih thuai tur thu Union Minister hi a lo hrilh a. Chite lui humhalh tura tun hnaia hmalakna kalpui mek dan pawh hrilhfiahin, bawlhhlawh paih leh sawngbawl lama harsatna Mizoramin a tawhte hriatpui tur leh a sutkian dan ngaihtuahpui turin a lo ngen nghal a ni.
