Tripura Camp-a Tuikuk awmte Mizorama hruai let hna thawh mekah a thawh hnihna chu vawiin khan Kolasib District leh Mamit District-a sawrkar official te kaihhruaina hnuah thawh leh tum a nih laiin Mizoram Bru Displaced Women Welfare Organisation (MBDWO) te hian lungawi lohna lo lantirin Camp a kal tur Official leh Lirthei
te hi an dang a ni.
Kanchanpur SDM leh SP ten Bru Hmeichhe hruaitute an biak hnuah Tuikukte hruaikir tura thawk chhuak Bus 17 leh official te chuanna lirtheite chu Police leh Tripura State Regiment venhimna hnuaiah him takin Kanchanpur-ah let pui leh an ni a, Kaskau Camp atanga Mamit District a let tur hruai tura thawh chhuah tum official te chuan Kasakau Camp hi an pan hman lo a ni.
Kawng zawhtute hi camp pathum, Naisingpara, Asapara leh Hajacherra-a awm, hmeichhiate an ni a, anmahni buaipuina tur hmun Facilitation Centre siam chu a chhe lutuk nia an hriat thu te, fur ruahtui tlak lai nena inmil lova an hriat thu te an auchhuahpui a, Mizorama let tur chhungkaw tinin Mamit, Kolasib leh Lunglei District ah te an duhna bera an awm phalsak an phut bawk a ni.
Camp hrang hranga awm Tuikukte hian tuna anmahni hruaikir hna thawh leh mekah hian thil phut chi hrang hrang 8 an nei a, chung zingah chuan Mizoram mi dik tak enfiahna lo neih tawa an hming chuang ve lote dinhmun en fiah nawn te, Mizoram chhunga an awmna tur hmun buatsaih chu an luah hmaa sorkar aiawh leh Camp hrang hrang hruaituten an enfiah hmasak te, Tuikuk te tana Autonomous District Council siam te pawh an thil phut zingah hian a tel a ni.
