Camp hrang hrang 6-a enfiahna neih a\angin Mizoram mi leh sa dik tak, Mizorama hruaikir theih tur hi chhungkaw 4420 an awm a, Tukuk hruaikir turte awmna tur District pathum, Mamit, Kolasib leh Lunglei District thuneitute chuan ruahmanna engkim peih felin, Tuikukte hruaikir tur hian Tripura-a Camp hrang hrangte hi an awmchilh tawh a, hetihlai hian Tuikukte inthlunkhawmna pawl, Mizoram Bru Displaces Peoples Forum MBDPF chuan thil phut dang an neih leh avangin tun \uma anmahni hruaikir tura hmalak mekna, a thawh kuana ni tawh chu a hlawhchham leh dawn niin a lang a, hetihlai hian MBDPF hian an mite zingah Mizorama let duh an awm anih chuan dan an tum lo tih a hmuna kalchilhtu Zonet Reporter K Lalhruaitluanga an hrilh a ni.
Tun \uma Tuikukte hruai kirna tur hian senso tur cheng vbc 100 chu Ministry of Home Affairs in Mizoram sorkar kutah a pe tawh a, he sum hmang hian Mamit, Kolasib leh Lunglei District thuneitute chuan Tuikuk hruaikir turte chuanna tur lirthei te ruahmanin kawng laka an ei leh in tur leh an chawlh lailawkna turte pawh engkim an ruahman fel a, Tripura ramri, Kanhmunah a \ul apiang lo buaipuina hmun tur Facilitation Centre siam a ni bawk.
Mizoram mi dik tak, hruaikir tura enfiah tawh chhungkaw 4420-ah hian mihring 27,106 an awm a, Mamit District chhung ami an tam ber a, chhungkaw 3368-a mihring 20830 an ni a, heng mi te hi khaw hrang hrang 39-a hruaikir tura ruahman an ni.
Kolasib District-a hruai kir tur chu chhungkaw 688-a mihring 4225 an ni a, heng mite hi khaw 10 ah dah tur an ni a, Lunglei District a hruaikir turte chu chhungkaw 364-a mihring 2051 an ni a, khaw pali-a dah tur an ni thung.
Tuikuk te hian kum 1994 ah Bru National Union (BNU) dinin kum 1994 ah Saipuilui khuaah conference an nei a, hetah hian Tuikuk te puala Autonomous District Council din an phut a ni.
Silai nena sorkar nawrin Bru National Liberation Front (BNLF) an din a, kum 1997 October ni 21 ah Forest Dept hnuaia Wildlife Game Watcher Pu Lalzawmliana chu Persang khuaah an kaphlum a, hemi hnua boruak \ang chho zelah BNLF te hian Mizorama Tukuk awm zawng zawng te chu Mizoram chhuahsan turin an hriattir zui a, Kum 1997 kum tawp lam a\angin Tripura-ah an pem chhuak \an a ni.
Kum 2010 June ni 30-a Lunglei District Tlabung sub division huamchhung, Mauzam leh Malsuri inkar kawnga Mizoram Police te an lambun chu Tuikuk hel pawl, BNLF te chetna rapthlak ber pakhat a ni a, khami \um khan Mizoram police 7 an kaphlum a ni. BNLF te hian kum 2005 July ni 25 khan khatihlaia Mizoram sorkar home minister Pu Tawnluia hmaah an silaite an tung a ni.
Tripura Camp-a awm Tuikuk te hruaikir tur hian \um 8 hmalak a lo ni tawh a, a hlawhchham zel hnuah nikum 2018 July ni 3 khan sorkar laipui aiawh, Mizoram sorkar, Tripura sorkar leh Mizoram Bru Displaced People’s Forum (MBDPF) aiawhte chuan khaih hunlaia Union Home Minister Rajnath Singh kaihhruaina hnuaiah September ni 30, 2018 ral hmaa Tuikuk te hruaikir vek tura inremna an lo ziak tawh a ni.
Hetiang hi thil awmdan a nih laiin MBDPF leh pawl dang pahnihte chuan Nilaini khan Mizoram Home Minister hnenah lehkha thehlutin, tun \uma Mizoram sorkarin an awm lailawkna tur a buatsaih chu awmna tlak nia an ngaih loh thu te, tun \uma an kir chuan an hnam nihphung an hloh ang tih an mipuiten an hlauhthawn thu te ziakin, sorkar aiawhte anmahni hruaikir tura Camp hrang hranga tir lo turin an ngen a, hetiang hi thil awmdan a nih avangin tun \um, a vawi 9-na pawh hi a hlawhchham leh hmel ta a ni.
