Bru Relief Camp hrang hrang a\anga ZONET thudawn danin Camp lian ber Naisingpara Camp-ah nikum November thlaa Mizoram mi chhinchhiah chhungkaw 2,916 zing a\angin Mizorama let duh in report pakhatmah an awm lova, nikuma Mizoram mi enfiahnaa tel ve lo Mamit District mi pakhat leh Kolasib District mi pakhat te erawh chu an inlana, sorkar mi tirh officer ten thil an zawhfiah hnuah heng mite hi Mizoram mia pawm an ni. Naisingpara khuaah hian sorkar mi tirh officer rual te hian nimin khan he camp-a Bru hruaitute chu an thil tih tur hrilhin vawiinah an kal nawn leh dawn tih an hrilh a, chumi ang chuan chawhma dar 10 khan an hnathawhna hmun tur thlengin Mizorama haw duh te in report turin aurinna hmangin an hriattir a ni.
Hamsapara Camp-ah chuan Mizoram mi chhungkaw 350 awm zingah chhungkaw khat chiah Mizorama haw duh in report a awm a, kum 2016-a chhinchhiah tel loh zinga mi nia insawi chhungkaw khat Mizoram mi nia insawiin officer te hmaah an inlan bawk a ni. Khakchangpara Camp-ah pawh chhungkaw khat chauh chawhnu her thleng khan an inlan a, Hazacherra Camp-ah chuan kum 2016-a Mizoram mi chhinchhiahnaah Mamit District mi chhungkaw 144, Lunglei District mi chhungkaw 384 leh Kolasib District mi chhungkaw 58 an awm a, an zingah hian Mizorama let duh, anmahni enfiahtu officer te hmaa inlan chawhnu her thleng khan mi pakhatmah an awm lo a ni. Hetihlai hian Kaskau Camp-ah erawh chuan Mizorama let duh nia insawi chhungkaw 193 nimina inlan bakah vawiin chawhnu her thleng khan Mamit District-a let tur chhungkaw 85 leh Kolasib District-a let tur chhungkaw 21 an awm a ni. Camp hrang hranga Mizorama let duh chhinchhiahtu sorkar officer te hi Tripura sorkar officer te leh Police ten an hnathawhna Camp hrang hrangah kalpuiin venhimna \ha tak an pe bawk a ni. Heng officer te hian tlai thleng khan an kalna Camp\heuhah Mizorama haw duh an hnena in report tur an nghak zui zela, Kanchanpur Dak Bangla-a riakin sorkar lam a\anga thuthar an hmuh hma chuan an hnathawh tur an chhunzawm zel dawn a ni.
