Camp hrang hrang a\anga ZONET thudawn danin refugee camp lian ber, Naisingpara-ah chuan vawiin nileng khan Mizorama haw duh in report pakhatmah an awm lova, he camp-a kal Mizoram sorkar officer te chuan chawhma dar 11 hma deuha camp an thlen hnuah Bru hruaitute an hmu a, MBDPF hruaitute chuan an thil tih tur an hriat loh thu leh inhriattir lawkna a awm loh avangin an mipuiten an thil tih tum engmah an hre lo tih an lo hrilh a, sorkar tirha officer kalte chuan an thil tih tum te Bru hruaitute chu hrilhin, an mipuite koh sak turin an ngen a, hemi rual hian kum 2016 November thlaa Mizoram mi an lo chhinchhiah tawh te chu an identification slip nen in report tur leh tun hmalama la chhinchhiah fel loh te chhinchhiah tura enfiah leh an tum thu an hrilh a, aurinna te hmangin MBDPF office a\angin an auva, amaherawhchu, vawiin chawhnu thleng khan Naisingpara camp a\angin Mizorama let tura hming pe tumah an awm lo a ni.
Hazacherra Camp-ah chuan Lunglei District mi chhungkaw 384 zingah Mizorama let tura in report an la awm rih lova, hetiang bawk hian Kolasib District mi chhungkaw 58 leh Mamit District mi chhungkaw 144 zingah Mizorama let duh in report tumah an la awm lova, he Camp-a kal Mizoram mi tirh Officer te chuan MBDPF office-ah vawiin chawhnu thleng khan in report tur te an nghak a ni. Hetiang bawk hian Khakchangpara, Hamsapara leh Asapara-ah te pawh in report tih tham an awm lova, Mizoram a\anga Camp hnai ber Kaskau Camp-ah erawh chuan chawhnu her thleng khan chhungkaw 195 an in report a, amaherawhchu, Bru hruaitute lam a\anga thuthar awm an hriat hnuah in report chhunzawm an awm lova, in report tawh te pawhin thudang an nei leh nia thudawn a ni. Puan tawh angin Tripura Bru Relief Camp 6-a Mizoram mi awm te hi tun thla ni 25 a\anga la let \ana, let tur awm zawng zawng September ni 25-a zawhfel tum a ni a, October ni 1 a\ang chuan Bru Relief Camp 6 te khara \anpuina leh chhawmdawlna awm zawng zawng pawh tihtawp tawh sorkar laipui chuan a tum a ni.
