An Ration leh \anpuina sum tihtawp a nih thu hi Naisingpara, Asapara leh Hazacherra camp amite chu nimin khan Kanchanpur Sub Divisional Magistrate, Pu Abhedananda Baidya chuan ziakin a hriattir a, hetiang bawk hian Panisagar Sub Division huam chhunga Bru Relief Camp pathum, Hamsapara, Khakchangpara leh Kaskau Camp amite chu Panisagar Sub Divisional Magistrate chuan ziakin a hriattir a, a lehkha copy hi MBDPF President, Pu A. Sawibunga leh MBDCC President, Pu T. Laldingliana te an pe bawk a ni. Ration buhfai an pek hi nikhatah puitling tan gram 600 leh naupang tan gram 300 a ni a, sum lama \anpuina cash dole hi puitling tan nikhatah cheng nga a ni a, naupang tan cheng hnih duli a ni. Zawhna chhangin MBDPF leh MBDCC hruaitute chuan Ration leh sum lama \anpuina tihtawp a nih hnu hian Bru Relief Camp-a awmte chu tun hnai mai khan an thla khat ration tur pek an nih avangin an la buai lem lova, ration an ei zawh hnua pek chhunzawm an nih loh hunah boruak eng ang nge thleng dawn tih erawh chu an la sawi thei lo niin an sawi a ni. Hetihlai hian Hazacherra Camp a\angin Inrinni khan chhungkaw thum Mizoramah laklet leh an ni a, heng mite hian vawiin khan Mamit a\angin Lunglei lam an pan a, Lunglei District-a inbenbel tir tum an ni.
Puan tawh angin hemi hmalam hian Tripura Bru Relief Camp 6-a Mizoram mi awmte hruaikir thawh 8-na, tuna neih mekah chhungkaw 31 hruaikir an lo ni tawh a, tuna hruaikir mek te nen hian an vaiin chhungkaw 34 an ni dawn ta a, heng mite hi Lunglei District-a hruaikir chhungkaw 21, Mamit Distict-a hruaikir chhungkaw 11 leh Kolasib District a hruaikir chhungkaw 2 an ni. Hetihlai hian Bru Relief Camp-a awm Mizoram mi dik tak hruaikir mek te leh Mizorama kir duh la awmte chu Mizoram Bru Displaced People Coordination Committee hmingin vau-na a awm nia sawi a ni a, hei hi MBDPCC hruaitute chuan thu diklo niin an sawi a, an pawl President, Pu T. Laldingliana chuan Zonet zawhna chhangin an pawl chuan Mizorama let duh tumah an vau lo niin a sawi a, he thu thehdarhtu hi zawn chhuah tumin an bei mek a, vawiin khan Kanchanpur Sub Divisional Magistrate pawh zawtfiah turin an kal niin a sawi a ni.
