He thu hi vawiina Mizoram Transport Workers Association General Assembly vawi 30-na chaltlanga Transport Department Conference Hall-a neihah sawiin Pu TJ Lalnuntluanga chuan, lirthei ke 2 nei chi ziah luh thar nasa takin a pung niin a sawi a, hetihlai hian chetsualna thlengah pawh a tam ber a ni a, a chhan chu lirthei khalh thiam sa ni lovin khawpui chhungah mipuite zinga khalh zir chawpa an khalh chhuah \hin vang niin a sawi a, hei hi pumpelh a nih theih nan driving licence nei tan chauh lirthei ke 2 nei chi lei phalna tur Scheme mumal tak duang turin hmalak mek niin a sawi. Pu TJ Lalnuntluanga chuan, Sorkar hnuaiah lirthei khalh zirna changtlung tak din a nih theih nan hmalak tum a nih thu te, lirthei chetsualna thleng avanga thihna leh piansualna thleng \hin pumpelh a nih theih nan State Road Safety Council pawhin chak takin hna a thawk dawn niin a sawi a ni. Transport Minister chuan, tuna Mizoram chhung chauha MST Bus an tlan tir \hin pawh huam zau zawka \henawm ram Tahan leh Tripuraa Zampui tlangdung bakah Manipur-a Churachanpur District thleng tlan tir tura hmalak niin a sawi a, Road Transports bakah Inland Water Transport System changtlung tak siam a nih theih nan hmalak tum niin a sawi bawk.
Inkhawm hi an pawl President, Pu C. Lalthlengliana’n a kaihruai a, hetah hian Minister chuan pension a chhuakte ngaihhruihna thilpek an hlan a, Department Director, Krishna Mohan Uppu-an thu a sawi bawk.
