Ngaihdamna tel lova lirthei endik runpui, No Tolerance Week hi tunkar thawh\annia lirthei chetisualna thleng thei laka fimkhurna hapta, Road Safety Week hman a nih rual khan hman \an ve nghal a ni a. hetah hian Transport Department hnauai Motor Vehicel Department leh Traffic Police \angkawp chuan lirthei leh a khalhtute chu lirtheiin a neih tur lehkha pawimawh hrang hrang an neih kim leh kim lohte, chhiah an pek leh pek lohte bakah lirthei khalhtuin Driving License a neih leh neih lohte an endik a. Lehkha pawimawh nei kim lote chu ngaihdamna tel lovin an man zel an ni. Traffic Police hotute chuan, lirthei an man zingah Road Tax pe lote, Insurance nung tawh lote, lirthei a\anga khu chhuak chu dan pawm chin a nih leh nih loh endikna, Polution certificate nei lo leh Driving License nei lova lirthei khalhte a ntam zual tih an sawi a, dan bawhchhia an mante chu a hmunah pawisa chawi tir nghal zel an ni a, pawisa chawi tur nei lote pawh an lehkha pawimawhte hrensakin, Traffic Police Office-a an pawisa chawi tur pe tura tih an ni.
No Tolerance Week hi nimin thleng khan neih a ni a, hetih chhung hian Motor Vehicel Department leh Traffic Police-te chu Aizawl khawpui chhung hmun hrang hrangah a inchhawnin an Duty \hin a ni. No Tolerance Week kalpui a nih avang hian Aizawl khawpui a ti thawl nuam hle a, \um danga Traffic Jam nasa vanga lirthei rei tak tak din \hin ang kha a awm lo a ni.
