Sorkarin Tlungvel VC \hiahna thupek August ni 6-a a tih chhuah avang khan VC te hian an mawhphurhna chu August ni 17 khan sorkar aiawh kutah an lo hlan tawh a, Dan anga insawifiahna hun pe lova Sorkarin a \hiah avanga Gauhati High Court-in sorkar thupek a hnawl tak avang khan Sorkar aiawh, LAD-a Field Inspector chuan Tlungvel VC te hi an mawhphurhna nimin khan a hlanlet leh a, mawhphurhna peklet leh an nih ni chiahah sorkar chuan a suspend leh nghal a ni.
Suspend-na thupekah hian Sorkarin Tlungvel VC te chungchang chu ngaihtuah nawn a duh tih tarlan a ni a, hemi chhung hian VC kaihhruaina dan, The Lushai Hills District (Village Councils) Act, 1953 Section 25(1) ‘|ul bikah chuan sorkarin hekna thubuai a ngaihtuah laiin VC te a chawlh lailawk tir thei ang’ tih tlawh chhanin thu leh awm hma chu Tlungvel VC chu suspend a ni tih tarlan a ni.
Tlungvel VC te suspend-na thupek chhuah anih rual hian sorkar chuan VC te hi insawifiah tura hriattirna Show Cause notice pawh a pe nghal bawk a, chutah Tlungvel VC te thil dih dik loa puhna chu Ombudsman in a ngaihtuah thu te, Ombudsman thutlukna anga DLAO Aizawlin a chhui chian thu te, compensation chungchanga ram in pek danah thil dik lo hmuh a nih thu te tarlangin, ni 15 chhunga insawifiah tura hriattir an ni.
Tlungvel-ah hian VC member paruk zinga pali chu congress member an ni a, a dang pahnihte chu MNF member an ni. National Highway number 54 laih zauhna tura ram lak turah zangnadawmna an dawn theihna tura ram inpe-ah Tlungvel VC te hi puh an ni.
