Tlabung khaw chhung bikah chuan, Lungleia District Marketing Officer-in phalna a pek anga Trade Facilitation Centre-a invawmlutte leh, Sorkar school-a insuanlutte chuan, tun kar laihawlah khan an chenna in pangngai an luah leh tan a, hetih lai hian Serhuan, Tippereghat leh Bindasora-ah chuan hmun him lama inkulh chhungkaw eng emaw zatte chu an chenna pangngaiah an la let leh lo a ni.
Nunsury YCA-te chuan vawiin khan an khuaah tuilian vanga chenna in chan hlen an awm leh awm loh an zirchiang tih sawiin, karleh thawhtanah vawiina an thil hmuh leh hriat te chu thuneitute hnenah thehluh an tum tih an sawi a, Tlabunga official-te pawhin khaw hrang hranga mipuiten tuilian vanga harsatna an tawrh dan te chu chipchiar zawka an zirchian hnu-ah, report pawh kimchang zawka peihfel thawkhat tawh a nih thu an sawi.
Hetih lai hian, Tlabung khua, tuna Lungleia awm mek inzawmkhawm – Tlabung Welfare Lunglei member-ten, tuilian tuarte tanpuina tura an thawh tlingkhawm chu nizan khan YMA, Tlabung branch kutah an hlan a, an chairman Pu Kawlkunga Kawlni chuan YMA, Tlabung branch president Pu Zokunga Sailo kutah an member-te thawh tlingkhawm Rs 16,500 chu tangkafaia hlanin, tuilian vanga harsatna an tawh vanga an manganna te chu an tawmpui tih sawiin, an tih theih tawk tih ve rawtna awm chu tipuitlingin an remchan ang zat theuh an thawh khawm ta tih a sawi.
