Thla thar ni 5-a Union Home Minister, BJP National President ni bawk Pu Amit Shah-a’n Mizorama a tlawh huna Mizote tana him lo Citizenship Amendment Bill kaltlangpui tum mek duh loh lantir nana Jt. NGO Coordination Committee-in lungawi lohna lantir an tum chu Mizoram Pradesh Congress Committee chuan an thlawp thu an puang thung a. Hetah hian Aizawl khawpui chhunga an party mite chu a tam thei ang ber NGO kaihhruaia CAB dodalnaah hian pawndum sina tel turin an ngen a ni. MPCC hian Union Home Minister Amit Shah hnenah CAB duh lohna Memorandum an thehlut dawn tih pawh sawiin, CAB hi Mizote tana him lo, chimral a an awm theihna tur dan hlauhawm tak a nih avangin a tirte atangin MPCC chuan a lo dodal tawh niin an sawi.