Thingtlang lo neiha eizawngten buh leh bal hlawk zawka an thar chhuah theihna tur leh kum tin lo hal vanga sik leh sa inthlak danglam nasa lutuk ti ziaawm tura hmalakna, Fostering Climate Resilient Upland Farming Systems in the North East (FOCUS) Office thar vawiin khan hawn a ni.

Mizoram Project Management office thar, New Capital Complex ami hi Agriculture Minister Pu C. Lalrinsanga’n a hawng a ni.

FOCUS chu United Nation agency pakhat International Fund for Agricultural Development hnuaia hmalakna a ni a, zawi zawia tlang ram lo vah leh lo hal kalsan a, sik leh sa mil a thlai kum hlun chinga lo neitute sum dehchhuah tih pun chu he hmalakna in a tum be a ni. IFAD atangin FOCUS Project atan hian loan US dollar maktaduai 35.25 ruahman a ni a. FOCUS project hian Agriculture, Horticulture, Animal Husbandry & Veterinary Department leh Land Resources leh Soil and Water Conservation Department te a huam a ni. Office thar hawnna inkhawm hi Agriculture Secretary Pu Lalhmingthanga’n a kaihruai a ni.