Nimin tlai thim dawn, dar 5:30 vel khan Thiak khaw dai, Aizawl lampangah mi pakhat, Scooter-a chuang chu Bolero Car pakhat Sialsuk lam panin a su hlum a. A sutu hi a tlan tlang avangin Sialsuk mipui thinrimin Bolero car hi an ti chhe nual a, thil tha lo lian tham erawh a thleng lo. Police hotute hnen atanga thudawn danin Bolero-in a sut hlum hi chhui zui nghal a ni a, Durtlang Ramthar Veng khawsa Lalnuntluanga, kum 27 vel mi a ni tih hriat chhuah a ni a, thil tihfel ngaite tihfel a nih hnuah vawiin khan Lalnuntluanga hi vui a ni. A sutu Bolero hi a mi sutna hmuna ding lovin a tlan chhia a, Sialsuk Police te hriattir an nih hnuah Sialsukah lo man a ni a, motor khalhtu hi Pranesh Shil a ni a, he Bolero-ah hian midang pahnih pawh an chuang a, Police te chuan Pranesh Shil hi vawiin khan Aizawlah an thawn nghal a, vawiin khan Court-ah inlantir a ni a, Magistrate thu angin Central Jail-ah dahluh a ni tawh a, IPC Section 279 leh 304(a) tlawh chhanin thubuai siamsak a ni. A sutu motor hi Thenzawla Horticulture College sak hna thawktu, Triveni Construction Ltd. ta a ni. Mi a sut hnua ngaihsak zui lova a tlan chhiat avangin he motor hi Sialsuk khaw mipui thinrim chuan an ti chhe nual a ni. Aizawl District SP, Pu Neihchungnunga chuan fimkhur inzirtirna hapta hman mek laia hetiang vanduaina a thleng hi pawi a tih thu sawiin, Hmuifang tlang leh Aizawl inkarah lirtheia chetsualna a thleng tam bik tih hriaa, he kawng hmangtute chu fimkhur lehzual turin a ngen a ni.
