Thenzawl PTS hi inrinni khan Aizawla thuthar lakhawmtu \henkhatin tlawhin, an hmalak dan an enfiah a, PTS Principal, Pu HL Thangzuala sawi danin, PTS hi kum 2011 March ni 2 khan PTC Lungverh a\angin sawn a ni a, a tirah chuan Police Training Centre tih niin, kum 2012 December ni 20 khan Police Training School-a hlankai a ni. PTS-ah hian Constable Training \um 3 neih tawh niin, mi 696 an Training chhuak tawh a, hei bakah hian Police Service lai kaisang tur leh intuaithar turte tan Training chi hrang hrang buatsaih tawh niin, mi 2,276 in Training an paltlang tawh a ni. Tunah hian ASI a\anga SI a kaisang tur mi 63 an Training mek a, heng mite hi kumin February ni 4-ah lut \anin April ni 4-ah an chhuak dawn a ni. Zawhna chhangin PTS hotute chuan, an hnena Training-te chu khauh taka enkawl an nih thu leh a bikin in-service Training-te chu Physical Fitness-a an hniam deuh \hin avangin khauh taka hrual \hin an nih thu leh kaisang tur bikte phei chu a tira an rihna an lak a\anga Kg 5 tal an rihna an tihhniam loh chuan Training paltlang lovin kaisang thei lo tura hrem an ni \hin niin an sawi. Thuthar lakhawmtute zawhna chhangin SI-a kaisang tur Training nei mekte chuan, an hotute enkawl dan chu a \hat tawk thu leh an hrual dan pawh duhthusam a nih thu an sawi a, hetihrual hian PTS chhunga ATM Booth awm lo chu an harsatna a nih thu an sawi a, hei hi a rang lama ngaihtuah ni thei se an duh thu an sawi a ni.
PTS hotute chuan, Thenzawl chu hmun laili a awm, khualzin tlawh tamna a nih avangin mikhual thlenna tur, Guest House an nei lo chu an harsatna a nih thu leh tunah hian Police Headquarters lamah Guest House sakna tur sum an dil mek thu sawiin, an hotu lian hmun dang a\anga lo kalte pawh mawihnai zawka an mikhual theih nan Guest House changtlung tak nei thei se an duh thu an sawi a. An hmachhawp langsar zingah tunah hian Parade Ground sirah International Standard Swimming Pool siam tura ruahman mek a ni a, hei hi a hautak avangin Department sum neihsa hmanga siam mai theih a ni lova, Home Minister pawhin Tourism Minister a sawipui tawh a, a ni pawhin a ngaihven hle nia an hriat thu an sawi a ni.
Thenzawla Police Training School hian an hnathawh \hat avangin kum 2015-16 khan Union Home Minister Medal for Excellence in Police Training (Non-Gazetted Training Institution) a lo dawng tawh a ni.
