North Khawlek khaw tlangval, kum 19 mi Lalnunsanga hi pawl 10 zir zo hlim, a lehkha zir chhunzawmna tura inhlawhfa a ni a, Thenzawl paltlanga Serchhip leh Buarpui inkar kawng laih hna thawh mekah sub-contractor pakhat hnuaia inhlawhfa a ni. Nimin chawhnu khan an hnathawhna bul lawk Tlawng lei hnuaia inbual tura a kal chu a chesual a ni.
Chanchin an hriat veleh Thenzawl atangin mi tlawmngaite chu Lalnunsanga zawng tur hian an thawkchhuak nghal a, an hmuh mai loh avangin Thenzawl Jt. VC leh Jt. YMA te hmalakna in khawtlang huapa zawn chhunzawm a ni a, Buarpui leh New Khawlek atangin mi thahnem tak ruang zawng hian an thawk chhuak bawk a, Aizawl a an in luahna veng Zemabawk YMA leh Local council hotute pawh Lalnunsanga chetsualna hmunah hian an kal a, ruang lak chhuah a nih hian Thenzawl Joint YMA chuan kuang tum sakin PTS Thenzawla a chhungte in ah lak a ni a, he mi hnu hian Thenzawla a innghahna te in lamah hunserh hmanpuiin Zemabawk East-a an in luah panpui a ni a, an khua North Khawlek ah vui tura phurh a ni ang.
