Vawiin Assembly Session-ah ZPM member, Pu Lalchhuanthanga zawhna leh zawh belhna dangte a chhannaah Pu Lalchamliana chuan, GST hman chuan \hatna a neih rualin \hat lohna pawh a nei ve tho tih a sawi a. Hnam dang engemawzat hnena Mizorama sumdawn phalna pek an ni chu a ngaihmawhawm rualin, Mizorama sumdawn phalna nei tura dan an zawm a nih chuan pek loh ngawt theih an ni lo a ni, a ti. Pu Lalchamliana chuan, GST hnuaia Mizorama sumdawn phalna nei turin sorkar hmasa khan dan \ha tak a lo duang a, chutah chuan Hnam dang Mizorama sumdawn phalna nei tur chuan ILP kum 2 chhung nung an nei tur a ni tih a ni a, hemi anga ILP kum 2 nung neiten sumdawn phalna an nei a nih chuan pek an ngai a ni, a ti. Sorkar laipui ruahmannaa chhiah lakna dan thar, Goods and Services Tax hman tak chuan thupui pakhat a nei a, chu chu One Tax, One Nation tih a ni a, hei hian a tum ber chu India khua leh tui ten chhiah inang tlang an pek a ni tih a sawi.
Zawhna dang chhannaah Taxation Minister chuan, GST hnuaia sumdawn phalna pek tawh, sumdawng si lote chu an Permit tihtawp sak theih a nih a rin thu a sawi a. State pawn a\anga bungraw lakluh phalna E-way Bill chu kawng lakah a lo thi hman a nih chuan pawisa dang chawi belh ngai lova tih nun thar leh theih a ni tih a sawi. Pu Lalchamliana chuan, GST hman a nih hnua Vairengtea Taxation Check Gate kharna thupek tihchhuah a nih tawh hnua hawn a la nih chhan chu thil dik lo tih tumte man chhuah an nih theihna tur a nih thu a sawi a. Hmun dang a\anga bungraw lo lut chu dik taka kalpui a nih \hin laiin Silchar a\anga bungraw lo kal zingah chhiah awl duh vanga bungraw lakluh zat ziah tlem a ni \hin a, hei hi thil dik lo a nih avangin Vairengteah lo endik \hin a ni a, hei hi Check Gate ti lovin Data Collection Centre tia vuah a ni, a ti. Online hmanga bungraw chah \hinte chu chhiah pe lova bungrua an chah theih zat bituk an ni a, Online-a bungraw chah \hin zingah hetiang bituk pel hi an la awm loh avangin chhiah lak a la ni rih lo tih Pu Lalchamliana chuan a sawi bawk.
