Zonet zawhna chhangin Social Welfare Minister hian ruihhlo vanga harsatna neite enkawlna hmun te mumal zawka enkawlna tur rules Mizoramin a neih ang hi India ram state dangah nei an la awm lo a ni a ti a, mi tlawmngai leh mi \hahnemngaiten ruihhlo ngaite enkawlna an din te chu tun dinhmunah kalphung mumal nei lovin anmahni dan siam leh inenkawlna siam chawp hmanga kal an ni deuh ber a, an dinhmun te chawikanga tihchangtlun an nih theihna turin he dan hi siam a ni a ti a, Dan thar hnuaiah hian center thar siam tum emaw, a awmsa emaw te viltu tur State level Accreditation Board din a ni ang a, Dist. tinah pawh an huam chhunga awm te viltu tur district level board din \heuh a ni bawk ang a, Board hian home hrang hrangte dinhmun zirchiangin an report zulzuiin pawm tlaka ngaihte chu thla 6 chhung enthlak phawt annih hnuah sorkar hriatpui ruihhlo ngai enkawlna hmunah pawm an ni ang a, thla 9 hnuah kum 2 chhung atan accreditation center nih an dil leh thei dawn tih Minister hian a sawi.
Mizorama ruihhlo ngai te enkawlna hmun Home leh Center te hi him zawk leh changtlung zawka kalpui anih theihna turin he dan hmang hian hmalak a ni dawn tih Social Welfare Minister Dr K Beichhua hian a sawi a, state dang te entawn tur khawpa \haa hmalak sorkarin a tum a ni a ti.
