Mizoram Pradesh Congress Committee Communication Dept chuan Primary leh Middle School-a thawk tur zirtirtu MR-a lak tumna hi National Council for Teacher Education (NCTE) dan bawhchhiat tumna a ni an ti a, India ram pumin an zawm, Dan dinglai hnuaiah zirtirtu tur te chuan Teacher Eligibility Test a paltlang ngei a ngai a ni an ti.
Primary leh Middle School-a zirtirtu ni tura India sorkar laipuiin TET paltlang ngei tur a ni a tih laiin MNF sorkar chuan dan palzutin hma a la nia sawiin MPCC communication Dept chuan hei hi mizo mipui, mizo naupang te leh zirtirtu nih tuma sum leh pai tam tak senga thiamna ngai lo zirchhuak tawh mizo thalaite hmuhsitna a ni an ti.
Zoram People’s Movement Exeucitve Committee pawhin Middle School leh Primary School zirtirtu 946 MR-a lak tumna chu zirna siam\hat aiin, party mite induhsak tumna a ni an ti a, MNF sorkar din hlima Education Minister ngeiin ‘Zirtirtu lak thar hunah Recuitment rules dinglai zawm a ni ang,’ tia a lo puan tawh chu paihin, MNF mite chauh lak theih turin dan an siam chawp a ni an ti a, hei hi party mi induhsakna hleihluak tak vanga zirna tihchhiat vek theihna niin an ngai tih an sawi.
Hetihlai hian MNF \halai chuan sorkarin zirtirtu nghet lo (muster roll) a lak turah trained teacher vek lak an ni dawn niin an sawi a, zirtirtu lak tur chu Zoram zirna siam\hatna tur pakhat a nih piah lamah \halai lehkha thiam hna zawng mekte hmakhua ngaihna vang niin an sawi.
Zonet-in sorkar lehkha pawimawh chi hrang hrang hmuh theih ang ang a zirchianna a\anga a lan danin Right of Children to Free and Compulsory Education Act, 2009 Section 23 in a sawi angin zirtirtu ni tura thiamna neih ngai chin bithliah chu National Council for Teacher Education (NCTE) kuta dah a ni a, NCTE hian kum 2010 August ni 23-a notification a chhuah-ah chuan Primary leh Middle School zirtirtu ni tur hian Teacher Eligibility Test paltlang phawt a ngai a, hemi ang hian Mizoram sorkar chuan Primary leh Middle School zirtirtu lakna dan recruitment rules chu siam\ha in, 2014 January ni 28 khan tih chuah a ni a, hetah hian Column 8 hnuaia clause 2 ah Teacher Eligibility Test pass an ni tur a ni tih chu dah a ni a, Column 8 hnuaia clause 2 hi Thawh\anni-a \hukhawm Council of Ministers thutlukna hian a ti danglam ta a ni.
Recruitment Rules-in a tarlan dan chuan Middle School zirtirtu hna hi Group B post a ni a, Primary School zirtirtu hna chu Group C post a ni thung.
Mizo Zirlai Pawl MZP chuan nikum July ni 7 khan Mizorama zirtirtu inkhairual lo chungchang an zirchianna an lo puangzar tawh a, RTE dan hnuaia zirtirtu pakhatin zirlai a zirtir tur zat Pupil Teacher Ratio chu Primary-ah zirtirtu pakhatin zirlai 30 zel leh Middle School-ah zirtirtu pakhatin naupang 35 zel anih laiin Mizoramah chuan Primary schoolah zirtirtu pakhatin zirlai 18 leh Middle school ah zirtirtu pakhatin zirlai 9 zel an zirtir ang a ni an ti a, Mizoramah zirtirtu an tam hle chungin thingtlang lamah erawh an indaih lo hle niin MZP te hian an lo sawi tawh a ni.
