Thailand puk-a tang football team pakhata rawlthar rual 12 leh an coach kum 25 mi te video thlalak pahnihna tih chhuah a ni a, an hriselna dinhmun a \ha tlang.
Video tharah hian hlim hmel pu takin anmahni hming an sawi kual diat diat a, heng rawlthar rualte hi ni 9 chhung zawn an nih hnuah Thawh\an zan khan puk chhung tui chim phak loh chinah him taka hmuh an ni a, chhanchhuah nghal theih mai an nih loh avangin ei leh in tur te pek luh an ni tawh a, an hriselna dinhmun pawh endik sak an ni tawh bawk. Heng rawlthar rualte hi dam taka hmuh ni tawh mahse, puk a\anga hruai chhuah dan turah erawh chhanchhuaktute an la bangbo rih hle a, tui kam hun nghakin thla khat lai pawh puk chhungah hian an tawm rih a la ngai mai thei a ni. Furpui in\an chho mek a nih avangin an tanna Tham Luang puk a tui chim chin hi a la san belh zel thei a ni a, Navy Seal diver pahnihin naupangte hi engtiklai pawhin an awmchilh rih dawn a ni.
Chhanchhuah hna thawktute chuan heng rawlthar rualte puk a\anga hruai chhuah dan tur hi an dap chunzawm zel a, an nunna atana hlauhawm thei tur zawng chuan engmah tih chhin an tum lo tih thuneitute chuan an sawi chiang tawh a, vawiina chanchinbumite an kawmnaah Thailand ram thuneitute chuan vawiin bikah chuan hruai chhuak tura hmalak a ni dawn lo tih an sawi. Puk chhunga tui tling pump chhuah hna pawh chawl lova thawh chhunzawm zel a ni a, rawlthar rualte tanna lai bik, puk chhungah tui a luh belh tawh lo a, an chhungte nena an inbiak theihna tuar telephone thlun luh tumna erawh a la hlawhtling rih lo a, puk pawn lamah chuan damdawi lam thiamten rawlthar rualte hruai chhuah an nih huna an hmalak dan tur an lo zirlawk ve mek bawk a ni.
Puan tawh \hin angin heng rawlthar rual kum 11 leh 16 inkar mi 12 te hi football team pakhata mi vek an ni a, an coach kum 25 mi nen June ni 23 khan pukah hian an lut a, ruahsur nasa avanga sabereka khuangkaihin puk chhungah tui a tih len thut avang leh puk luhna lai vel chu tuiin a chim tak avangin Tham Luang pukah hian an tang zui ta a ni, ni kaw chhung an tan hnuah Thawh\an zan khan British tui lut thiam ten an tanna ah hian an han hmu chhuak ta a, an tanna hi puk luhna a\anga km 4 zet a nih avang leh puk chhungah tui a la tam avang te, chirh leh bawlhhlawh tam takin a hnawh bawk avangte in rawlthar te hian tui luh dan bulthum leh hmanraw hman dante an zir phawt loh chuan tun dinhmunah chuan hruai chhuah ngaihna an la awm rih lo a ni.
