ZPM Chief Ministerial Candidate, Pu Lalduhoma chuan, Pathianin amah ringtute tan hriselna leh damreina a tiam chunga Mizote an hrisel lo leh an thi hma chu ram rorelphung dik loh vang niin a sawi. Nimina ram zalenna champha Lammuala lawmnaah Chief Minister, Pu Lal Thanhawla’n mihring hriselna tehna, Health Index-ah Mizoram chu State t>-ah pakhatna a nih thu leh ram pumah 2-na a nih thu a puang chu thil awiawh loh tak nia sawiin, heti khawpa Cancer vei tamna leh HIV hluarna ni chunga hrisel ber anga insawi chu thil zahthlak tak a ni, a ti a. Khawvela damrei ber Monaco-ah chuan kum 89.52 dam anga chhut an ni a, India-ah chuan mihring damrei zawng chawhrual chu kum 68.13 a ni a, Mizoramah chuan Sorkar-in mihring damrei zawng record a nei lo nia sawiin, zia lo a tih thu a sawi a. Thlanmual-ah \halai leh pavalai thlan hmuh tur tam tak a awm a, accident-a thi aia mahni intihlum an tam zawkte chu a vanduai thlak a, Petrol, Gas, Buhfai, Cement leh thil dangte tihchingpen \hin a ni a, hemi pawh veng thei lo sorkar-in ram an kaihhruai \hin avangin mipuite an damrei thei lo niin a sawi. Pu Lalduhoma chuan, Mizoram Sorkar leiba tlingkhawm chu cheng vbch. 7,887 a tling hial nia sawiin, Pathianin amah ringtute chu malsawmna tam tak dawng tura a tiam laia heti zat leiba kan neihna chhan chu ram hruaituten mipui hausak an hlauh vang nia sawiin, inthlan dawnah an chhia leh \ha hriatna hmang thei lo khawpa inchep an nih theih nan mipui an intodelh an hlauh vang niina sawi a. Khaw tam taka an zinnaah chuan an thusawi ngaihthla duh leh an mahni chibai duhte pawhin NLUP list a\anga paih an hlauh avangin an inlan ngam lo \hin nia sawiin, hetiang khawpa inrahbehna hi a awm thei chuang lo niin a sawi. ZPM Chief Ministerial Candidate chuan, |angrual Pawl a sorkar chuan kum 5 chhunga kawlphethaa intodelh tura \anlak a nih tur thu te, buha intodelh tur te, sangha, arsa leh nitin mamawh hrang hranga intodelh tura \anlak a ni dawn niin a sawi.
ZPM Secretary General, Pu K. Sapdanga pawhin, |angrual pawl din tur hian kum 2015 November thla a\angin an inrawnkhawm \an a, Mizoramah kalphung thar, mipui sorkar a awm theih nan nikum August ni 15 khan he pawl hi a lo piang ta a ni, a ti a. A tira an relnaa telve pawl \henkhat an mahni la zawm ve ta rih lote chu an tel ve theih hun nghakhlel takin an thlir reng tih sawiin, \angrual pawl chu Political Party, pawl leh mimal tupawh, Zoram siam\hat duhtute tan zawm theih ring a ni tih a sawi. Pu K. Sapdanga chuan, |angrual pawl chu a din tirh a\angin beitu an awm nghal nia sawiin, an \anrual theih tak tak an rin loh thu te, putar awm khawm tih te, hotu ruat hunah an buai ang tih te, Flag hman turah an buai ang tih te, Symbol-ah an buai ang tih te, inthlan zawhah an keh darh ang tih te, Unit pawh an nei lo engmah an ni chuang loang titein an bei a, heng zawng zawng hi tunah chuan an paltlang vek tawh avangin an mahni beitute chuan sawi tur an hre tawh lo niin a sawi a ni. Pu K. Sapdanga chuan, ZPM a sorkar chuan Minister bathlar leh Secretariat tuala eizawng tawh lovin ram lamah mipuiten ei an zawng tawh dawn niin a sawi a, kumina Mizoramin inthlanpui a hmanchhawn tur chu taimak inzirtirna leh thatchhiat ninzirtirna inbeihna tur leh kristian nuaibo tum tute leh kristian duhtute inbeihna tur a ni dawn niin a sawi.
ZPM Val Upa Council Chairman, Pu Lalfkazuala chuan, tuna Mizoram awm dan en hian siam \hat a \ul hle tih a lang a, chumi hlen chhuak tur chuan ZPm hi a lo piang ta a ni, a ti a. Kum 40 chhung zet Mizoram kaihhruaituten min hruai thlen theih chin chu tun hi a nih avangin Sorkar thar siam kawngah mipuiten mawhphurhna lian tak an nei tih an hriat a ngai tih a sawi. ZPM Steering Committee Senior Vice President, Pu Lalhmangaiha Sailo pawhin, sorkar awm tawhten an mawhphurhna hlenin, sprkar \ha din ni se chuan \angrual pawl hi a din a ngai dawn lo a, chutian gni lova sorkar huapzo an din \hin loh avangin he thawh hona hi a lo piang ta niin a sawi. Lungleia ZPM Southern Headquarters Chairman, Pu Lalrinzuala pawhin, ram roreltuten ram an kaihhruai dan a dik tawk loh avanga mipui rumna chhanchhuak tura he pawl thar hi din a ni tih a sawi a. |angrual pawl chu Poltical Movement a ni satliah lova, mipui \awng\ai chhanna a nih avangin a nghet a, tun hmaa ram kaihruaitute kal \hin angin a kal ve mai mai dawn lo niin a sawi.
He inkhawm hi Zoram siam\hatna khawmpui Organising Committee Chairman, Pu Vanlalhlana’n a kaihruai a, chawhnu lamah Vice Chairman, Pu B. Lalchhanzova kaihhruaiin mual inkhawm an nei a ni.
