Manoharan tih hlum hun tur ngaihtuah nawn tura ngenna hi judge pathum, Justice RF Nariman-a kaihhruai chuan an ngaihtuah a, a ukil chuan tih hlum anih hmain thubuai ngaihtuah chhoh a nih dan ennawn lehna hun pe turin Supreme Court hi a ngen a, Court hian thi tura in hremna a nih avangin ukil hi thubuai ngaihtuah chhoh dan zirchianna hun pek a ni a ti a, October ni 16-ah ngaihtuah nawn turin a dah a ni.
Manoharan-a ukil hian thubuai ngaihtuah anih chhungin ukil pasarih an inthlak hman tih a sawi a, thiam loh chantir Manoharan-a dinhmun dik tak zirchian leh phawt a dil a, hemi hmalam hian thi tura Manoharan-a chungthu lo rel tawh chu Court hian a lo nemnghet tawh a ni.
Manoharan-a leh a thurualpui thiam loh chantir tawh tho Mohankrishnan te hian kum 2010 Octobe thla khan naupang unau pahnih chu an rubo a, hmeichhe naupang chu an pawngsual hnuah bawnghnute tur telh an intir a, an ruang chu tui kawngah an paih a ni. Mohankrishnan zawk hi chu police ten man an tum laia an inbeihnaah a thi a ni.
