Tamil Nadu-ah mi pakhatin nupui neih hmangin sum a tuak niin sawi

Tamil Nadu-a motor-a thil phurh lama sumdawng pakhat, B Purushothaman-a chuan, a sumdawnna a kal tluan loh hnuah nupui neih hmangin sum a tuak nia sawi a ni a, a hlawhtling hle a, mahse a hmingchhe hle a ni. Kum 8 chhungin nupui 8 a nei a, cheng vbc. 4 leh nuai 50 a neih belh na a, a vanneihna a tawp ta niin a sawi. A nupui pakhat, Chennai-a College zirtirtu, Indira Gandhi, kum 45 chu nupuia a neih hnuah, Chennai-a a nupui in lian tak chu hralhtirin, Coimbatore-a chenpuiah a thlem a, a nupui chuan a remtih hnuah cheng nuai 150-in an hralh a, a pasal chuan a pawisa chu a tlanbopui ta daih a, a pasal, a in leh a in hralhna pawisa chu a chan ta vek a ni. Indira Gandhi chuan police hnenah thil awm dan a thlen a, an han chhui chian chuan hetiang bawk hian Purushothaman-a hian a hmain hmeichhe pathum dang a lo bum tawh a, Indira hi 4-na a ni a, a hnuah mi dang 4 a bum zui leh tih an hre thei ta a, a nupui dang pathum pawhin Police hnenah an thlen ve avangin Inrinni khan Purushothaman-a hi FIR siamsak a ni ta a, an sum hloh hi cheng nuai 450 vel niin an sawi. Purushothaman-a hian a nupui pakhat, Kumudavalli-i hnenah, thubuai tenau a neih thu leh, chin fel a nih hnuah chuan cheng vbc. 17 a neih belh tur thu a hrilh a, ani pawh hian a pasal chu rinhlelhna nei lovin, a ram chu cheng vbc. 3 a hralhin, a hralhna pawisa chu a pasal hi a pe a, hei pawh hia tlanbopui daih a ni. Police-te sawi danin, a hma chuan Purushothaman-a hian Gandhipuram-ah truck transport office a nei a, Vellalore-ah a nu leh a fanu nen an cheng a, a nupui hmasa ber chu a sun tawh a ni.