Syria Eastern Ghouta-a hel pawlte Syria sipaiin an beih dan chu rin phak baka nasa a ni tih UN-in a sawi. Tanpui hna thawktu, Regional Humanitarian Coordinator Panos Moumtzis in BBC palai a hrilh danin, Bomb hmanga ni thum beih a nih hnuah mi 250 chuang an thi tawh a, Syria sipaite chuan helai hmun hi helho lak atanga chhanchhuah an tum niin an insawi. Hetihlai hian sorkar lam tang sipaite hian Syria hmar lam Kurdish ho awmna Afrin an lut tan a, Turkey sipai te leh Syria hel pawlte an hmachhawn dawn a ni. Turkey chuan laipui hmanga an lo kah let avangin sorkar sipaite hi an hnung tawlh leh rih niin an sawi. Pathianni zan atang khan sorkar lam sipaite hian Russia puihna nen helai hmuna sorkar laka hel pawl awmte lakah hian beihpui an thlak a, helai hmuna chanchinbumi pakhat Riras Abdullah chuan khawi hmunah mah tlan chhiatna a awm lo tih a sawi a, bomb puak ulh ulh karah nu nau manganga tap thawm te chu hriat a hrehawm hle tih BBC a hrilh a, laipui mu leh missile te chu a sur in a sur a ni ber tih a sawi. Hetianga sipaite beihpui thlakna vanga mitthi te zingah hian 50 zet chu naupang an ni a, mi 1,200 chuang zetin hliam an tuar bawk. UN chuan hliam tuar leh tanpui ngaite tanpui an nih theih nan inkahhai puang turin a ngen a ni.
Chanchin Thar Syria sipaiin hel pawlte an beih dan rin phak baka nasa niin...
