Syria sorkarin chemical ralthuam siamna tur hmanrua, North Korea atangin a la thin niin UN-in a sawi. UN hnu chhui mite chuan Syria-a chemical ralthuam sawngbawlna hmuna, North Korea mite pawh an hmuh thu te leh, an bungraw chawk luh zingah hian acid dahthatna te pawh a tel niin an sawi a ni. Mi thiamte chuan Syria-in North Korea atanga chemical ralthuam a lakluh avang hian, North Korea lam pawhin nuclear ralthuam siam a tumna kawngah, sumfai a neih belh zel niin an sawi bawk a, ram pahnih-te an indawr vang hian khawvel dinhmun a derthawng zel niin an sawi bawk. Puan tawh angin Syria khawpui Damascus dâi leh Ghouta velah, sorkar sipaiten chlorine gas ni ngeia hriat hmangin mi an bei niin US chuan a lo sawi tawh thin a, Syria-a tualchhung buaina a chhuah tirh, kum 2011 atang tawh khan North Korea hian Syria sorkar hi a pui thin niin US leh a kaihhruai ramte chuan an lo sawi tawh thin a, Syria hian kum 2013 khan chemical ralthuam lam chi reng reng a siam chhunzawm loh tur thu leh, a neih sa te pawh a tih ral a lo intiam tawh a ni.
