Syria Eastern Ghouta atanga civil mi inthiarfihlim duhte tan kawng hawng turin nawr

Syria in hel pawlte laka beihpui a thlakna Eastern Ghouta atanga civil mi inthiarfihlim duhte tana kawng hawng tura Syria President Bashar al-Assad nawr turin US in Russia a nawr. Assad-a rorelna Syria Sorkar hian East Ghouta ah hian beihpui a la thlak chhunzawm zel a, civil mi tam takin an tuar mek a ni tih Pentagon thupuangtu Dana White chuan a sawi a, Syria nena inrem lohna neih chu US chuan a duh lo a, Assad-a rorel dan chu nawrlet ve turin Russia chu a nawr zawk a ni a ti. Thawhtanni khan Russia chuan nikhatah vawi khat tal tanpui ngaite tanpuina tur leh tlan chhuak duh te tlan chhuah theihna tura inbeih chawlh lailawk neih thin a rawt a, heti chung hian Syria sipai te leh hel pawl te hi Eastern Ghouta leh a chhehvelah hian an la inbei chhunzawm zel a, UN security Council in inkahhai puang tura a lo rel tawh hlawhtlinna turin Ruassia in tih tur a nei niin White hian a sawi. UN chuan ni 30 chhung inkahhai puang tura tih chu zawm vek tura ngenin, tanpuina chi hrang hrang phurtu truck 40 zet chu inbeihna tawp ruala luh tumin inring renga dah a ni tawh tih a sawi.