He inkawm hona Mission venga Synod Office JM Lloud Hall-a neih hi Synod Moderator, Rev. R. Lalhmingthanga’n a kaihruai a, kohhran aiawha thusawitu Synod Secretary, Rev. R. Vanlalnghaka chuan, ram roreltu leh kohhran chu inhrethiam tawn taka kal tur an ni tih sawiin, ram hmasawnna tura infin chhuah leh inngaichang tawna \anlak ho a \ul a ni, a ti. Kohhranin a ngaihpawimawh a sawi zingah Rev. R. Vanlalnghaka chuan, eng lai mahnin kohhran chuan zu zawrh chu a duh ngai lo tih a sawi a, eirukna tibo tura \anla turin Mizoram sorkar chu an beisei tih a sawi a, eirukna chu ram hmelma, mihring nun leh rilru tichhetu leh ram hmasawnna daltu a nih avangin kohhranin a duh lo tih a sawi a, tuna Sorkar mekin eirukna awm lo tura theihtawp chhuah an tum thu an sawi chu lawmawm an tih thu leh a taka an hlenchhuah ngei an beisei tih a sawi.
Rev R Vanlalnghaka chuan Pathianin Zofate chenna tur ram a pek venghim leh humhalh kawngah pawh nasa zawk leh chak zawka \an la tura ngenin, Assam ramri ngaipawimawh a, ramri hrula chengte thlamuang taka an awm theih nan hmala tur leh Citizenship (Amendment) Bill, 2016 chu Mizoram leh sakhaw tan a him loh avangin nasa zawka dodal tura an beisei thu a sawi a. Mizote chu hnam tlemte an nih avangin chimrala an awm mai loh nan fa nei tam tura inzirtir a, sorkar laipuiin Family Planning Policy a kalpui pawh fa nei tlem tura inzirtir nana hmang lova, chhungkaw \ha nei thei tura inzirtir nan hmang zawk turin tuneitute chu a ngen a ni.
Rev. R. Vanlalnghaka chuan, hleih nei lova dik leh \ha taka rorel turin Sorkar hotute chu a ngen a, Sorkar Falgship Programme, SEDP pawh party induhsakna atan hmang lova, ram hmasawnna tak tak thlentu atan hmang tura ngenin, ram hmasawnna tura thil \ul zual – kawlphetha siam chhuah, ei leh bara, inkalpawhna kawng \ha nei tur te, vantlang hriselna leh zirna ngaipawimawh a, leilung leh nungchang humhalh kawng \anla tur leh Mizoram chu AGMUT Cadre hnuaia awm reng lova Cadre hran a neih theih nana hmala tur leh All India Service, Central Service leh Central Secretariat Group B Servcie-a Mizo \halai tam zawk an luh theih nana \anla turin Sorkar hotute chu a ngen bawk a ni.
Chief Minister, Pu Zoramthanga pawhin, Synod hotuten an ngaihpawimawh thil hrang hrang an thlente chu an ngaih pawimawh leh bawhzui mek a ni hlawm tih sawiin, ramin chak taka hma a sawn theih nan theihtawp an chhuah dawn tih a sawi a. Mizoram chu khawvela Pathiannia a pui a nawia Pathian be tura biak in-a kal \hin awm chhun an nih tawh avangin chanchin \ha hril kawngah pawh mawhphurhna thuk tak an nei a, sorkar an kaihhruainaah pawh kohhran nena inmil a kal a ngai a ni a ti a, harsatna leh buaina an tawh chang pawha a khai chhuaktu chu Kohhran a nih \hin avang leh, sorkar \ha a awm theih nana \awng\aipuitu pawh kohhran tho a nih avangin thlamuan thlak a tih thu Pu Zoramthanga chuan a sawi a ni.
Assembly Speaker, Pu Lalrinliana Sailo pawhin, zu khap chungchangah kohhran chuan tih tur nei vea a hriat thu sawiin, ruihhlo hmanga sumdawngte hrem chungchangah pawh tlawmngai pawl leh Kohhran-in a tih tur a tih hnuah Kohhran chuan a bawhzui ve thei ang em tih chu a rilru-a a awm thu a sawi a. Hemi kawnga hmalaknaah hian kohhran hrang hrangte chu inlungrual thei se a duh thu a sawi bawk.
Synod Executive Committee hian MLA tharte chu Bible bakah lawmpuina thilpek a hlan \heuh a, hetah hian damlohna leh harsatna dang vanga tel thei lo MLA 4/5 an awm tih loh chu MLA-te an tel kim thei a, Synod lamah pawh Presbytery tin aiawh mi 3 \heuh an tel a ni.
