Uttar Pradesh-a BJP MLA in hmeichhe tleirawl pakhat a pawngsual nia sawi leh a hnua thil thleng zui zel kaihhnawiha Supreme Court rorelna hi Uttar Pradesh sorkar tan mualphona nasa tak a tling a, Court hian Uttar Pradesh sorkar Yogi Adityanath-a kaihhruai chu tleirawl hnena zangnadawmna cheng nuai 25 pe nghal turin a ti a, he hmeichhia hi a chuanna car chu Pathianni khan truck in na taka a sut avangin thih hlauhawm khawpa hliam tuarin Damdawi Inah enkawl mek a ni.
Chief Justice Ranjan Gogoi-a kaihhruai Supreme Court Bench hian hmeichhe tleirawl chuanna car, Truck pakhatin a sut dan chhui chiangtu CBI te chu ni 7 chhunga an hna thawk zo turin a hriattir a, pawngsual thubuai pawh ni 45 chhunga chhui zo turin a ti bawk.
Hmeichhe tleirawl chhungte hian vauna nasa tak an tawk tih sawiin July ni 12 khan Supreme Court chu an chungchanga inrawlh turin an ngen a, Pathianni khan he tleirawl pawngsual tawk nia sawi leh a ukil te bakah a chhungte chuanna car chu Truck pakhatin na takin a su a, a ni te pahnih an thi a, a ukil nen, he tleirawl hian hliam na tak an tuar a ni. He thilah hian pawngsualtu-a puh BJP MLA, tuna Jail-a tang mek Kuldeep Singh Sengar chu a inrawlh ngei niin tleirawl chhungte hian an sawi a, he thil thlen a\anga a ni 4-naah Supreme Court hian he thubuai hi ngaihtuahin a kaihhnawih thubuai dang te nen Delhi a ngaihtuah tur hian a sawn ta a ni.
Tleirawl pawngsualtua puh, lung ina tang mek Kuldeep Sengar hi BJP chuan an party a\angin a hnawtchhuak tawh bawk.
