Muslim mipate’n an nupuite, chawp leh chilha an then mai theihna, Triple talaq an tih chu Supreme Court-in a hnawl. He court thuchhuak ngaihven hlawh takah hian court sang ber chuan hetianga mahni nupui then mai theihna hi awmze nei lo, ram danpui leh dan dang kalh, Muslim lehkhabu thianghlim, Quran duh dan pawh ni lo niin a sawi a, Triple talaq an tih hnuaiah hian Muslim mipaten thumal, “talaq” tih chu vawi thum an chham chuan an nupuite an then nghal mai thei a, tunah phei chuan ral khatah pawh telephone, text message, Whatsapp leh Skype hmangte pawhin he thu hmang hian an nupuite an then ta fo a, Muslim hmeichhiate chuan an dinhmun a chhia-in a hniam lutuk nia ngaiin, chawp leh chilha vakvai ta pawh an tam tawh niin an sawi. Talaq hi Arabic tawng chuan inthenna lam sawina a ni ber a, Muslim sakhaw zirtirnain a ken tel ni lo mah se, ram chhunga Muslim tih dan chi khat a ni a, triple talaq hian sawisel a hlawhna pawh a rei tawh a ni. Judge panga awmna, Supreme Court bench chuan vawiin khan triple talaq chungchangah hian thutlukna a siam a, an zinga 3-in triple talaq hi hnawl an duh a, pahnih erawh chuan an duh lo a, an thuremna hi phek 395 laia thui a ni.
Chief Justice, JS Khehar leh Justice Nazeer-a chuan triple talaq hi thla ruk chhung hman khap phawt ni se, hemi chhung hian sorkarin sorkarin dan thar siam se an ti a, Justice RF Nariman, Justice UU Lalit leh Justice Kurien Joseph-a erawh chuan triple talaq hian ram danpui a kalh hrim hrim niin an ngai thung a, court sang ber chuan, Parliament-in thla ruk chhunga hemi chungchanga dan thar a siam lo a nih pawhin khap chhunzawm a nih tur thu a sawi ta a ni. Triple talaq an tih hmanga nupui then theihna hi Muslim ram 22 laiah khap a ni tawh a, Pakistan leh Saudi Arabia ramte pawhin an khap tawh a, Muslim hmeichhiate leh, he dan hmanga nupui then khap a nih theih nana nasa taka nawrtute chuan, India ramah Muslim hmeichhiate zalenna leh thawvenna dar vuak a ni ve ta niin an ngai a ni. Hemi chungchang ngaihtuahtu, Judge panga hi sakhaw inang lo hlir – Sikh, Kristian, Parsi, Hindu leh Muslim an ni a, thu thehluh an ngaihtuah 7 zinga 5 chu Muslim hmeichhiate thehluh a ni a, a dang pahnih chu mihring dikna leh chanvo humhalhtu pawl thehluh a ni. Triple talaq hmanga inthen dan hi kum tam tak hman ni tawh mah se, Sharia Islamic law leh Koran-ah pawh a chuang lo niin BBC chuan a sawi a, Islamic mi thiamte chuan, Koran hian nupa inthen theih dan chiang takin a sawi a, dan ang taka inthen thei tur chuan, inrem lehna leh inngaihtuah nawn lehna thla thum tal an nei tur niin an sawi.
Triple Talaq hman zel sawi mawitu, All India Muslim Personal Law Board chuan thla leh ni 10-ah khian hemi chungchanga thil tih zui dan tur ngaihtuah turin Bhopal-ah thut khawm an tum a, he Board working committee member, Zafaryab Jilani chuan, tunah chuan court sang ber thuchhuak hi sawisel mai a remchang rih lo tih sawiin, an thutkhawm hunah hian Triple talaq chungchang bakah Babri Masjid chungchang pawh ngaihtuah tel a nih tur thu a sawi. All India Muslim Personal Law Board hian, Muslim mipaten an nupuite, chawp leh chilha an then mai theihna, Triple talaq hi sakhaw thil, kum tam tak an lo hman tawh a nih avangin, court rorelna hmanga nuai bo mai theih a ni lo niin a lo sawi tawh a ni.
