Jammu and Kashmir ah hian August thlaa Article 370 paih a nih hnuah internet hi khuahkhirh a ni a, kha leh tuite chet velna khuahkhirh te, internet khuahkhirh leh mipuiten zalenna bulthum an neih khuahkhirh sak theihnate chu uchuaka hman tur a ni lo tih Supreme Court chuan a sawi a, thla 5 kalta chhunga Jammu and Kashmir-a khuahkhirna siam zawng zawngte chu mipuiten dan rorelna-a an khinlet theih tura puanzar tur a ni a ti.
Internet tih thih chungchang hi ngaihtuah chhunzawm thuai a ni dawn tih Supreme Court chuan sawiin, hetiang khuahkhirhna hi hun engemaw chen atan bik a nih loh chuan court in a enfiah thei a ni a ti a, ram danpui hnuaia khua leh tuiten an duh zawng sawi chhuah theihna an neih, freedom of speech and expression chuan internet pawh a huamtel a ni a ti.
Kashmir ah hian political party hruaitu langsar tak tak chief minister hlui pathum tiamin che chhuak thei loa hren beh chhunzawm zel an la ni a, Supreme Court hian Section 144 CrPC puan nawn mawlh mawlh pawh sawiselin, mipuite ngaihdan hup behna hmanruaah hman tur a ni lo a ti bawk a, mipui nawlpuiin zalenna an neih leh venhimna chungchangah lai taka thil thlir chu court in a tih tur a ni a, politics thila ham\hatna duh vanga thil tih a awm leh awm loh court chuan a ngaihtuah tel lo a ni a ti.
